हवामान विभागानं हिमाचल प्रदेशातील मंडी जिल्ह्यासाठी मुसळधार ते अतिमुसळधार पावसाचा 'रेड अलर्ट' जारी केला आहे. या पावसामुळे बियास नदीच्या पाण्याच्या पातळीत लक्षणीय वाढ झाली असून, पूरस्थिती गंभीर होत चालली आहे. ड्रोन फुटेजद्वारे नदीच्या वाढलेल्या प्रवाहाची आणि पुरामुळे निर्माण झालेल्या परिस्थितीची गंभीरता स्पष्टपणे दिसून येत आहे. मंडीसह बिलासपूर, सोलन, शिमला, सिरमौर, हमीरपूर, कांग्रा, कुल्लू, उना आणि चंबा या जिल्ह्यांमध्ये पुराचा तसेच भूस्खलनाचा संभाव्य धोका हवामान विभागाने व्यक्त केला आहे. त्यामुळे नागरिकांना सतर्कतेचा इशारा देण्यात आला आहे. सुरक्षिततेच्या दृष्टीने अनेक जिल्ह्यांमध्ये शाळा बंद ठेवण्यात आलेल्या आहेत. आपत्कालीन परिस्थितीत तातडीने मदत मिळावी यासाठी यंत्रणांना सज्ज राहण्याचे निर्देश देण्यात आले आहेत. नागरिकांनी हवामान विभागाच्या सूचनांचे काटेकोर पालन करण्याचं आवाहन करण्यात आलं आहे.