वर्धा जिल्ह्याला पावसाने चांगलेच झोडपून काढले आहे. या पावसामुळे देवळी तालुक्यातील डिगडोह येथे यशोदा नदीला अचानक आलेल्या पुरामुळे तिघेजण अडकले होते. सुदैवाने स्थानिक प्रशासनाच्या तत्परतेमुळे तिघांची सुखरूप सुटका करण्यात आली. अडकलेल्यांमध्ये एका शाळकरी मुलाचाही समावेश होता.

गुरुवारी सकाळी भावेश अमोल कापसे (वय १५, रा. डिगडोह), उमेश रामदास साखरकर (वय ३८, रा. नागझरी) आणि प्रज्वल पंडित सावरखेडे (वय ४०, रा. नागझरी) हे तिघे पुराच्या पाण्यात अडकले. रात्रीपासून जिल्ह्यात मुसळधार पावसाने हजेरी लावल्यामुळे यशोदा नदीसह परिसरातील नदी-नाल्यांना पूर आला आहे.

या घटनेत एक दुचाकी व सायकल वाहून गेल्याची माहिती आहे. घटनेची माहिती मिळताच देवळीचे तहसीलदार समर्थ क्षीरसागर यांनी तातडीने घटनास्थळी धाव घेतली. जिल्हा आपत्ती व्यवस्थापन पथक आणि देवळी नगरपालिकेच्या अग्निशमन दलाच्या मदतीने रेस्क्यू ऑपरेशन राबवत तिघांना सुरक्षित बाहेर काढण्यात आले. तहसीलदार क्षीरसागर यांनी नागरिकांना आवाहन केले आहे की, नदी-नाल्यांना पूर आला असेल तर त्या ठिकाणी जाऊ नये, आपली आणि इतरांची सुरक्षा महत्वाची आहे.