बीड: महादेव मुंडे हत्या प्रकरणातील फरार असलेला संशयित आरोपी गोट्या गीतेचा एक धक्कादायक व्हिडिओ सध्या सोशल मीडियावर प्रचंड व्हायरल होत आहे. या व्हिडिओमध्ये गोट्या गीतेने थेट रेल्वे रुळावर बसून आत्महत्येचा इशारा दिला आहे.

या व्हिडिओमध्ये गोट्या गीते म्हणतो की, वाल्मीक कराड म्हणजे साक्षात विठ्ठलाचा अवतार आहे, तर बापू आंधळे खून प्रकरणातील आरोपी बबन गीतेला पोलिसांनी सिलेंडर करावं. शिवाय, माझ्यावर आरोप करणाऱ्या जितेंद्र आव्हाडांनी हे आरोप थांबवावे. अन्यथा मी आत्महत्या करेल आणि त्याला जबाबदार फक्त जितेंद्र आव्हाड असतील, असा इशारा या व्हिडिओमधून गोट्याने दिला आहे. हा संपूर्ण प्रकार रेल्वे रुळांवर बसून चित्रीत करण्यात आला असून, व्हिडिओच्या माध्यमातून त्याने मोठा भावनिक स्फोट केलाय.

महादेव मुंडे खून प्रकरणातील मुख्य संशयितांपैकी एक असलेला गोट्या गीते अजूनही फरार आहे. मात्र, आता तो स्वतःच असा इशारा देतोय, त्यामुळे त्याला लवकर अटक होते का, याकडेही सगळ्यांचे लक्ष लागून राहिले आहे.