नाशिकमध्ये पावसाचा जोर कायम असून धरणांच्या पाणलोट क्षेत्रात देखील मुसळधार पाऊस सुरू आहे. त्यामुळे नाशिकच्या गंगापूर धरणातून पाण्याचा विसर्ग वाढवण्यात आला असून सध्या 4 हजार 656 इतका पाण्याचा विसर्ग गोदापात्रामध्ये सुरू आहे. त्यामुळे नाशिकच्या रामकुंड परिसरामध्ये पुर परिस्थिती ओढवली असून आजूबाजूच्या परिसरात पुन्हा पाणी शिरले आहे.

याच दरम्यान रामकुंडात रात्रीच्या सुमारास एक तरुण पाण्याच्या प्रवाहात अडकल्याची घटना घडली. पाण्याचा विसर्ग वाढवल्याने हा तरुण अडकून पडला होता. परिणामी पाण्यात अडकलेल्या तरुणाने तब्बल अर्धा तास सिमेंट खांबाचा आधार घेतला. हा थरारक प्रसंग स्थानिकांच्या लक्षात आला आणि तरूणांनी रेस्क्यू टीमला ही माहिती दिली आणि काही वेळातच मोठ्या कसरतीनंतर या तरुणाला बाहेर काढण्यात यश आले आहे. अचानक गंगापूर धरणातून पाण्याचा विसर्ग वाढवल्याने तरुणाची मोठी फजिती झाली होती. मात्र तरुणाला सुखरूप पुराच्या पाण्यामधून बाहेर काढल्याने मोठी दुर्दैवी घटना टळली.