Nashik : नाशिकमध्ये ३१४ ग्रॅम एमडी ड्रग्ज, ३७ किलो गांजा जप्त; नाशिक पोलिसांची कारवाई

तबरेज शेख 
नाशिक : अमली पदार्थांचे सेवन करण्याचे प्रमाण दिवसेंदिवस वाढत चालले आहे. मुळात अमली पदार्थ विक्री व वाहतुकीस बंदी असताना मोठ्या प्रमाणात विक्री केली जात आहे. यात गेल्या सहा महिन्यात नाशकात अमली विरोधी पथकाने तब्बल ८४ कारवायांमध्ये ८१ जणांना अटक केली आहे. तर त्यांच्याकडून ३१४.५ ग्रॅम एमडी ड्रग्स पावडरसह ३६ किलो गांजा जप्त केला आहे.

मागील काही वर्षांमध्ये नाशिक शहर अचानकपणे एमडी ड्रग्जच्या खरेदी- विक्रीद्वारे प्रकाशझोतात आले होते. यामुळे पोलिस आयुक्तालयाने गेल्या दीड ते दोन वर्षापासून ठोस पावले उलचली आहेत. ड्रग्ज मुक्त नाशिकचा टास्क शहर पोलिस आयुक्तालयाकडून हाती घेण्यात आला आहे. कुठल्याही अमली पदार्थाची खरेदी- विक्री कोणत्याही माध्यमातून होऊ नये, यासाठी अमली पदार्थ विरोधी पथकासह गुन्हे शाखाची सर्व पथकांना सतर्कतेच्या सूचना देण्यात आल्या आहेत. 

ड्रग्स विक्रीत महिलांचाही समावेश 

नाशिक पोलिसांनी वेगवेगळ्या ठिकाणी छापेमारी करत कारवाई केली आहे. सहा महिन्यात करण्यात आलेल्या कारवायांमध्ये ८१ जणांना ताब्यात घेतले आहे. विशेष बाब म्हणजे ड्रग विकणाऱ्यांमध्ये सहा महिलांना अटक करण्यात आली आहे. या महिला बारावी शिकलेल्या असून बावीस ते पंचवीस वर्षाच्या वयोगटातल्या असल्याचे पोलिसांनी सांगितले.

पान टपरीचीही तपासणी 

दरम्यान नाशिक शहर व परिसर ड्रग्जमुक्त व्हावा; यासाठी सातत्याने कारवाया देखील केल्या जात आहे. अधूनमधून विविध पान स्टॉल, कॅफेची तपासणी करण्यात येते. यामध्ये अमली पदार्थाचा अवैध व्यवसाय आढळून आल्यास कारवाई केली जात आहे. तर पोलिसांचाही छुपा सहभाग आढळून आल्यास त्यांच्यावरही कठोर कारवाई करण्यात येणार असल्याचा इशारा पोलिस आयुक्त संदीप कर्णिक यांनी दिला आहे.