हिंदी सक्तीच्या विरोधात रविवारी मुंबई मराठी पत्रकार संघाच्या परिसरात करण्यात आलेल्या आंदोलनात जीआरची होळी केल्याप्रकरणी तब्बल २५० ते ३०० जणांविरोधात गुन्हा दाखल करण्यात आला आहे. या प्रकरणात शालेय शिक्षण अभ्यास आणि कृती समितीचे डॉ. दीपक पवार यांच्यासह अनेक आंदोलकांवर मुंबई पोलिसांनी कारवाई सुरू केली आहे.

हिंदी भाषेच्या सक्तीविरोधात आंदोलनात शिवसेना ठाकरे गटाचे पक्षप्रमुख उद्धव ठाकरे यांचीही विशेष उपस्थिती होती. त्यांनी यावेळी हिंदी सक्तीविरोधात सरकारवर जोरदार टीका केली होती आणि राज्य सरकारच्या भूमिकेचा तीव्र निषेध नोंदवला होता.

जीआरची होळी करत राज्य सरकारच्या निर्णयाचा प्रतिकात्मक निषेध करण्यात आला. मात्र यामुळे सार्वजनिक मालमत्तेचे नुकसान आणि कायदा-सुव्यवस्थेचा प्रश्न निर्माण झाल्याचे कारण देत पोलिसांनी गुन्हा दाखल केला आहे. या आंदोलनामुळे राज्यात पुन्हा एकदा मराठी विरुद्ध हिंदी या मुद्द्यावरून राजकीय वातावरण तापले आहे.