विकास काटे, ठाणे | साम टीव्ही

राज्याचे उपमुख्यमंत्री एकनाथ शिंदे यांना बालेकिल्ला असलेल्या ठाण्यातच मोठा धक्का बसला आहे. उमेदवारी अर्ज दाखल करण्याच्या शेवटच्या दिवशी शिंदेसेनेत बंडखोरीची पहिली मशाल पेटली आहे. शिंदे यांचे अत्यंत जवळचा समजल्या जाणाऱ्या टेंभी नाका शाखा प्रमुखानंच बंडाचं निशाण हाती घेतलं आहे.

शिंदे यांचे निकटवर्तीय समजले जाणारे निखिल बुडजडे टेंभी नाका शाखाप्रमुख. ठाणे महापालिका निवडणुकीत शिंदे सेनेकडून उमेदवारी मिळेल अशी अपेक्षा होती. पण त्यांना पक्षाकडून उमेदवारी देण्यात आली नाही. त्यामुळे त्यांनी उघडपणे नाराजी व्यक्त केली होती. मी अनेक वर्षांपासून सामाजिक कार्य करत आहे. त्यामुळे मला निवडणूक लढवायची होती. अपक्ष उमेदवार म्हणून निवडणूक लढवणार असल्याचंही बु़डजडे यांनी सांगितलं होतं. त्यानुसार, त्यांनी उमेदवारी अर्ज दाखल केला आहे. माझी कुणावरही नाराजी नाही, असं त्यांनी स्पष्ट केलं आहे. टेंभीनाक्यावरूनच शाखाप्रमुखानं बंडखोरी केल्यानं शिंदेंसमोर मोठं आव्हान निर्माण झालं आहे, असं मानलं जात आहे.