पावसाळी अधिवेशनाच्या तोंडावर राज्याचे उपमुख्यमंत्री एकनाथ शिंदे दिल्ली दौऱ्यावर आहेत. शिंदे नेमके दिल्लीला का गेले? यावरून अनेक तर्कवितर्क लावण्यात येत आहे. दरम्यान, एकनाथ शिंदेंनी दिल्लीत अमित शहांची भेट घेतली. या भेटीदरम्यान नेमकी काय चर्चा झाली? यावर खासदार संजय राऊतांनी मोठा दावा केला आहे. अमित शहांची भेट घेऊन शिंदेंनी भाजपाला ऑफर दिली असून, आपल्याला मुख्यमंत्री करा, अशी मागणीही केली, असा दावा राऊतांनी केलाय.

' गुरूपौर्णिमेच्या निमित्ताने एकनाथ शिंदे यांचा आधीच प्लान ठरला होता. यावेळी शिंदेंनी शहांच्या पायावर डोकं ठेवलं. पायाला चंदन लावून फुलं ठेवली. त्यानंतर नेहमीप्रमाणे त्यांनी देवेंद्र फडणवीस यांची तक्रार केली. शिंदेंनी त्यांना एक ऑफर दिली. मराठी माणसाची एकजुट तुटली नाही तर,आपल्यासाठी धोकादायक ठरेल. मला मुख्यमंत्री केल्यावर उपाय निघेल. त्यावर शहांनी मुख्यमंत्री भाजपाचाच असेल असं सांगितलं. त्यावर शिंदेंनी, माझ्यासह संपूर्ण गट मी भाजपात विलिन करायला तयार आहे', असा गौप्यस्फोट प्रसारमाध्यमांशी बोलताना राऊतांनी केला.