अभिजीत देशमुख, साम टीव्ही

कल्याण-डोंबिवली परिसरात गेल्या काही दिवसांपासून अधूनमधून पावसाची ये-जा सुरू होती. मात्र आज सकाळी आणि दुपारी दोन वेळा तासभर जोरदार पाऊस कोसळल्याने वातावरणात गारवा निर्माण झाला. मात्र, परिसरातील नागरिकांना नाहक त्रास सहन करावा लागत आहे.

मुसळधार पावसाने केडीएमसी प्रशासनाच्या नालेसफाईच्या दाव्यांची पोलखोल केली आहे. डोंबिवली पश्चिमेकडील एच वॉर्ड शेजारील रस्त्यावर गुडघ्यापर्यंत पाणी साचल्याचे चित्र पाहायला मिळाले. दरवर्षी या रस्त्यावर पावसाळ्यात पाणी साचते, मात्र तरीही केडीएमसीकडून कोणतीही ठोस उपाययोजना केली जात नसल्याचा आरोप स्थानिक नागरिकांनी केला आहे. रस्त्यावर पाणी साचल्यामुळे नागरिकांनी संताप व्यक्त केला आहे.