पांडवकडा धबधब्यावर तरुण अडकला, मदतीसाठी याचना, कसा वाचला जीव, पाहा व्हिडिओ

खारघर परिसरातील पांडवकडा धबधब्यावर अडकलेल्या एका तरुणाचा अग्निशमन दलाने थरारक बचाव करत जीव वाचवला आहे. अतिवृष्टीमुळे पाण्याचा प्रवाह प्रचंड वाढलेला असतानाही, अग्निशमन दलाने जीवाची पर्वा न करता धाडसाने हा रेस्क्यू पूर्ण केला.

दरम्यान, सदर धबधब्यावर प्रवेश करण्यास प्रशासनाने बंदी घातलेली असतानाही अनेक तरुण नियम झुगारून झऱ्यापर्यंत पोहोचण्याचा प्रयत्न करत आहेत. याच दरम्यान, एक तरुण पाण्याच्या प्रवाहात अडकला होता. घटनास्थळी तातडीने पोहोचलेल्या खारघर अग्निशमन दलाने अत्यंत जोखमीच्या परिस्थितीत बचावकार्य राबवले.

या धबधब्यावर जाण्यासाठी अनेकजण जंगलातील छोट्या पायवाटांचा वापर करत असल्याचे आढळून आले आहे. यामुळे वारंवार अशा प्रकारच्या घटनांना तोंड द्यावे लागत आहे.

प्रशासन आणि स्थानिक पोलिसांनी यापूर्वीही वारंवार इशारे दिले असतानाही तरुणाईचे धाडस थांबत नाही. अशा घटनांवर अंकुश ठेवण्यासाठी आता अधिक कठोर उपाययोजना करण्याची गरज व्यक्त केली जात आहे.