सोलापूर: शहर डिजेमुक्त व्हावे, यासाठी जिल्ह्यातील डॉक्टरांनी मोठा मोर्चा काढला. हा मोर्चा ऑफिसर्स क्लबपासून पोलीस आयुक्त कार्यालयापर्यंत नेण्यात आला. याआधी काही दिवसांपूर्वी ज्येष्ठ नागरिकांनीही डिजेमुक्त सोलापूरसाठी रस्त्यावर उतरून आवाज उठवला होता. आता वैद्यकीय क्षेत्रातील तज्ज्ञांनीही या चळवळीला पाठिंबा दिला आहे. सोलापूर हे उत्सवांचं शहर म्हणून ओळखलं जातं. मात्र, डिजेच्या कर्णकर्कश आवाजामुळे उत्सवांचं विद्रूपीकरण होत असल्याची चिंता व्यक्त करण्यात आली. पारंपरिक वाद्यांचा आग्रह धरत, कोणत्याही सण, जयंती किंवा उत्सवाला विरोध नसल्याचं डॉक्टरांच्या मोर्चातून स्पष्ट करण्यात आलं. या मोर्चाच्या माध्यमातून नागरिकांना आरोग्यदायी आणि शांततापूर्ण वातावरण राखत पारंपरिक पद्धतीने उत्सव साजरे करण्याचं आवाहन करण्यात आलं आहे.