सचिन कदम, दिवेआगर, साम टीव्ही

स्टंटबाजीला सध्या प्रचंड ऊत आला आहे. अनेकदा स्टंटबाजी जीवावर बेतल्याच्या घटना अलीकडच्या काळात घडल्या आहेत. आभासी प्रसिद्धीपायी अनेकांना जीव गमवावा लागलाय. असाच एक स्टंटबाजीचा व्हिडिओ सध्या सोशल मीडियावर व्हायरल होत आहे. रायगडच्या दिवेआगर समुद्रकिनाऱ्यावरील हा व्हिडिओ आहे. या ठिकाणी फिरायला आलेले काही पर्यटक पर्यटनाचा निखळ आनंद घेण्याऐवजी आसुरी आनंद घेताना दिसत आहेत. एकानं तर आपली आलिशान कार किनाऱ्यावर गरागरा फिरवली. समुद्रात लाटा उसळत असताना कार थेट पाण्यात दामटवल्याचे व्हिडिओमध्ये दिसून येते. बेदरकारपणे कार पळवत असतानाची दृश्ये कॅमेऱ्यात कैद झाली आहेत. या जीवघेण्या स्टंटबाजीचा व्हिडिओ सोशल मीडियावर व्हायरल होत आहे. समुद्रकिनारी धुमाकूळ घालणाऱ्या या पर्यटकांवर स्थानिक प्रशासन आता कोणती कारवाई करते याकडे सर्वांचे लक्ष लागले आहे.