देवेंद्र फडणवीस हे २०३४ पर्यंत मुख्यमंत्री राहतील, असं विधान भाजप प्रदेशाध्यक्ष चंद्रशेखर बावनकुळे यांनी केलं होतं. त्यामुळं राजकीय वर्तुळात सर्वांच्या भुवया उंचावल्या होत्या. याबाबत माजी मुख्यमंत्री आणि महायुतीतील महत्वाचा घटकपक्ष असलेल्या शिवसेनेचे नेते एकनाथ शिंदे यांना माध्यमांनी विचारणा केली असता, त्यांनी दोन्ही हात जोडून त्यांना शुभेच्छा, अशी प्रतिक्रिया दिली होती. बावनकुळेंच्या वक्तव्याबाबत आता स्वतः मुख्यमंत्री फडणवीस यांनी प्रतिक्रिया दिली आहे.

बावनकुळे यांनी ठरवलं तर, ते पुढची १०० वर्षे मलाच मुख्यमंत्री म्हणून ठेवतील, अशी मिश्किल प्रतिक्रिया फडणवीस यांनी दिली. ते पुण्यात बोलत होते. दरम्यान, महाराष्ट्र पोलिसांच्या क्षमतेवर प्रश्नचिन्ह आणि त्यांच्या कामावर संशय घेणारं वक्तव्य शिवसेना आमदार संजय गायकवाड यांनी केलं होतं. त्यावर विचारलं असता, फडणवीस यांनी अप्रत्यक्षपणे इशारा दिला. उपमुख्यमंत्री एकनाथ शिंदे यांच्याकडे मी संजय गायकवाड यांच्याबाबत चर्चा करणार आहे. त्यांनी संजय गायकवाड यांना कडक शब्दांत समज द्यावी. हे असं वारंवार चालणार नाही, असं फडणवीस म्हणाले.