ज्या धुळ्याला नंबर वन करण्याचा चंग नरेंद्र मोदी यांनी ठेवला आहे. त्याच धुळ्यातून मोदींच्या सभेची सुरुवात झाली आहे. पंतप्रधान मोदींच्या नेतृत्वात मागच्या दहा वर्षात जे काम झालंय त्यावरून पुढच्या पाच वर्षात धुळे जिल्हा हा महाराष्ट्रातील नंबर एकचा जिल्हा होईल, असा दावा उपमुख्यमंत्री देवेंद्र फडणवीस यांनी धुळ्यातील सभेत केला आहे. पंतप्रधान नरेंद्र मोदी आजपासून दोन दिवस महाराष्ट्राच्या दौऱ्यावर आहे. विधानसभा निवडणुकीच्या अनुषंगाने राज्यातील विविध जिल्ह्यात त्यांच्या प्रचारसभा होणार आहे. यावेळी फडणवीस यांनी भाषणात पहिली प्रचारसभा धुळ्यात होत असल्याचा आनंद व्यक्त केला आहे.

पुढे बोलताना फडणवीस म्हणाले की, 'धुळे जिल्ह्यामध्ये शेतकऱ्यांच्या बांधापर्यंत पाणी पोहोचवण्याचं काम मोदींच्या आशीर्वादानं होत आहे. सुलवाडे जामफळ प्रकल्पातून आज जिल्ह्याच्या प्रत्येक शेतीपर्यंत पाणी जात आहे. शहराला पिण्याच्या पाण्याची टंचाई भासू नये म्हणून अक्कलपाडा धरणाची उंची वाढवण्याचं काम आता बघायला मिळत आहे. आज धुळ्यामध्ये मुंबई इंडस्ट्रियल कॉरिडोरसह अनेक प्रकल्प मनमाड - इंदोर रेल्वेच्या माध्यमातून जोडले गेले आहे. त्यामुळे धुळे जिल्हा राज्यातील पुढचं इंडस्ट्रीज सेंटर बनेल', असा विश्वास यावेळी बोलताना फडणवीस यांनी व्यक्त केला आहे.

Edited By Rakhi Rajput