दरवर्षीप्रमाणे यंदाही मुंबई आणि ठाणे परिसरात कोट्यवधींच्या पारितोषिकासह उंचच उंच दहीहंड्या उभारण्यात आल्या आहेत. या दहीहंड्या फोडण्यासाठी गोविंदा पथक सज्ज झाले असून चुरस रंगण्यास सुरुवात झाली आहे. यामध्ये पुरुष पथकांसोबत महिलांच्या पथकांचाही तितकाच जोशपूर्ण सहभाग दिसून येत आहे.

‘गो गो गो गोविंदा… गोविंदा रे गोपाळा, यशोदेच्या तान्ह्या बाळा…’ असा घोष सध्या मुंबई, ठाणे आणि नवी मुंबईच्या कानाकोपऱ्यात दुमदुमतोय. दादर पश्चिम येथील आयडियल बूक डेपो जवळ साई दत्त मित्र मंडळ आयोजित दहीहंडी उत्सवात यंदाही महिला गोविंदांचा मोठ्या प्रमाणात सहभाग दिसून आला आहे.

या मंडळाच्या दहीहंडी उत्सवाची खासियत म्हणजे येथे महिला दहीहंडी, अंध व्यक्तींसाठीची दहीहंडी तसेच दिव्यांगांसाठीची दहीहंडी अशा विविध उपक्रमांमधून अनोखा उत्साह प्रकट होतो. त्यामुळे यंदाही दादर पश्चिमेतल्या या दहीहंडी महोत्सवाबद्दल मोठी उत्सुकता पाहायला मिळते.