शिवसेनेचे अध्यक्ष आणि नेते म्हणून एकनाथ शिंदे यांनी मंत्रिमंडळात राहावं अशी मी त्यांना विनंती करतो, ते आमची विनंती मान्य करतील अशी अपेक्षा आहे, असं विधान देवेंद्र फडणवीस यांनी म्हंटलं आहे. महायुतीच्यावतीने आज राज्यपालाकंडे सत्तास्थापनेचा दावा सादर करण्यात आला. राज्याचे मुख्यमंत्री म्हणून देवेंद्र फडणवीस यांच्या नावावर शिक्कामोर्तब आता झालं आहे. सत्ता स्थापनेच्या दाव्यानंतर महायुतीच्या तिन्ही प्रमुख नेत्यांची पत्रकार परिषद पार पडली. यावेळी फडणवीस बोलत होते. त्यांच्या या वक्तव्यामुळे अद्यापही शिंदेंच्या भूमिकेचा सस्पेन्स कायम असल्याचं दिसत आहे.

पुढे बोलताना फडणवीस म्हणाले की, पाच तारखेला संध्याकाळी साडेपाच वाजता राज्यपाल महोदयांनी शपथविधीची वेळ दिली असल्याचं सांगत देवेंद्र फडणवीस यांनी महायुतीमधील इतर सर्व घटक पक्ष, अपक्षांचा उल्लेख करत सर्वांचेच आभार मानले आहेत. विद्यमान मुख्यमंत्री एकनाथ शिंदे यांनी तसेच अजित पवार यांनी मला मुख्यमंत्री म्हणून शपथ देण्याची विनंती राज्यपालांकडे केली आहे. पंतप्रधान नरेंद्र मोदी यांच्या उपस्थितीत हा सोहळा आझाद मैदानात होणार असल्याचेही फडणवीस यांनी सांगितले. तसेच किती मंत्र्यांना शपथ दिली जाईल, याची माहिती संध्याकाळी देणार असल्याचे सांगत आम्ही दिलेले आश्वासन पूर्ण करण्यासाठी महायुती म्हणून कायम एकत्र काम करणार असल्याचा विश्वास या वेळी फडणवीस यांनी व्यक्त केला.

Edited By Rakhi Rajput