छत्रपती संभाजीनगर जिल्हा बँक निवडणुकीसाठी एकूण २१ संचालक पदांसाठी तब्बल २१४ जणांनी उमेदवारी अर्ज दाखल केले आहेत, त्यातील ११३ अर्ज वैद्य आणि ४५ बाद आहेत. कन्नडच्या आमदार संजना जाधव आणि सिल्लोडचे नगराध्यक्ष समीर अब्दुल सत्तार यांचा अर्ज बाद झाला आहे. जिल्हा मध्यवर्ती सहकारी बँक निवडणुकीसाठी जिल्ह्यातील सर्वपक्षीय दिग्गज नेत्यांनी उमेदवारी अर्ज दाखल केले. तब्बल २१४ अर्ज दाखल झाले असल्याने आज होणाऱ्या अर्ज छाननीकडे सर्वांच्या नजरा लागल्या होत्या. जिल्हा बँकेच्या एकूण २१ संचालक पदांसाठी ही निवडणूक होत आहे. सत्ताधारी महायुतीतूनच सर्वाधिक अर्ज दाखल झाले आहेत. भाजपकडून ओबीसी कल्याण मंत्री अतुल सावे, आमदार अनुराधा चव्हाण, संजना जाधव, शहराध्यक्ष किशोर शितोळे, शिवसेनेकडून पालकमंत्री संजय शिरसाट, काँग्रेसचे खासदार डॉ. कल्याण काळे यांसह आमदार अब्दुल सत्तार यांचे चिरंजीव अब्दुल समीर आणि पालकमंत्री शिरसाट यांची कन्या हर्षदा शिरसाट यांनीही अर्ज दाखल केले आहेत.