यंदाच्या गणेशोत्सवात मंडळांना महानगरपालिकेच्या नव्या नियमांचा फटका बसणार आहे. मुंबई महापालिकेनं यंदा गणेशोत्सव मंडळांवर मोठा दंड लागू केला आहे. सार्वजनिक रस्त्यावर मंडप उभारण्यासाठी खड्डा खोदल्यास मुंबई महानगरपालिका प्रत्येक खड्ड्याच्या बदलात तब्बल १५ हजार रुपये दंड आकारणार आहे. मागील वर्षी हा दंड केवळ २ हजार रुपये होता. त्यामुळे यंदा तो साडेसात पटीनं वाढ झाला आहे.

महापालिकेच्या या निर्णयामुळे सार्वजनिक गणेशोत्सव मंडळांमध्ये तीव्र नाराजी आहे. अनेक मंडळांनी या दंडाच्या निर्णयाचा जोरदार विरोध केला असून, तात्काळ हा आदेश मागे घेण्याची मागणी केली आहे.गेल्या काही वर्षांपासून गणेशोत्सव मंडळांना परवानग्या, अटी आणि आर्थिक बोजामुळे अडचणींचा सामना करावा लागत आहे. त्यात आता वाढीव दंडामुळे मंडळांच्या नियोजनावर परिणाम होण्याची शक्यता व्यक्त केली जात आहे.