हिंगोली नगरपालिका निवडणुकीचा प्रचार आता अंतिम टप्प्यामध्ये आला आहे. जशी निवडणूक जवळ येत आहे. तशी महायुतीमधील नेत्यांमध्ये सुरू असलेल्या वाद टोकाला जात आहेत. हिंगोली पालिकेच्या निवडणुकीत शिवसेना आमदार संतोष बांगर यांच्या वहिनी रेखा श्रीराम बांगर निवडणुकीच्या मैदानात आहेत तर भाजपकडून मागील निवडणुकीत नगराध्यक्ष राहिलेले बाबाराव बांगर यांच्या पत्नी नीता बांगर या उभ्या आहेत. त्यातच राष्ट्रवादीने देखील मुस्लिम चेहरा देत आबीनाबी अजिश प्यारेवाले यांना या निवडणुकीच्या मैदानात उतरवले आहे. महायुतीच्या नेत्यांविरोधात महाविकासआघाडी मात्र, हिंगोलीमध्ये एकसंघ असून शिवसेनेने महाविकासआघाडीमधून विनायक भिसे यांची बहिण अर्चना श्रीराम भिसे यांना उमेदवारी दिली आहे.

दरम्यान या निवडणुकीत महायुतीविरुद्ध महाविकासआघाडी अशी नेत्यांची खडाजंगी होण्याची शक्यता असताना हिंगोलीत मात्र भाजप विरुद्ध शिवसेना असा वाद सुरू झाला आहे. त्यातच आता भाजप आमदार तानाजी मुटकुळे यांनी अत्यंत धक्कादायक विधान केले आहे. शिंदेसेनेचे आमदार संतोष बांगर यांनी एका दिवसात पक्ष बदलत 50 कोटी घेऊन एकनाथ शिंदे यांच्या शिवसेनेत प्रवेश केला होता. 50 कोटी घेतले ही बाब खरी असल्याचं मुटकुळे म्हणाले आहेत, आमदार मुटकुळे यांच्या या वक्तव्यामुळे अख्या देशाला भाजपाकडून उत्तर मिळाले आहे. यावरती संतोष बांगर यांची अद्याप प्रतिक्रिया आली नाही. त्यामुळे ते काय उत्तर देणार याकडे सगळ्यांचे लक्ष लागले आहे.