सोलापूर: मागील काही दिवसात अचानक मृत पावलेल्या कावळ्यांचा मृत्यू हा बर्ड फ्लूमुळे झाला असल्याचे स्पष्ट झाले आहे. भोपाळ येथील लॅबमधून मृतकवळ्यांचे रिपोर्ट हे बर्ड फ्लू पॉझिटिव्ह आढळल्याने सोलापूर शहरातील स्थानिक प्रशासन आणि पशुसंवर्धन विभाग ॲक्शन मोडवर आले आहे. सोलापूर शहरातील छत्रपती संभाजी महाराज तलाव, श्री सिद्धेश्वर महाराज तलाव, खंदकबाग या परिसरात काही दिवसांपूर्वी 50 हून अधिक कावळ्यांचा मृत्यू झाला होता. या कावळ्यांचा मृत्यू बर्ड फ्लू ने झाल्याचे आता स्पष्ट झाल्याने मृत कावळे आढळून आलेले परिसर महापालिका निर्जंतीकरण करत आहे. यामुळेच मृत कावळे आढळून आलेले परिसर 21 दिवसांसाठी बंद केले जाणार असल्याची माहिती प्रशासनाने दिली आहे.