बातमी सांगलीतून... काँग्रेसच्या नगरसेवकांनी भाजपमध्ये प्रवेश केलाय. प्रदेशाध्यक्ष रवींद्र चव्हाण, पालकमंत्री चंद्रकांत पाटील यांच्या उपस्थितीत पक्षप्रवेश सोहळा पार पडला. यावेळी खासदार विशाल पाटील यांचे कट्टर नगरसेवक मनोज सरगर यांच्यासह माजी महापौर कांचन कांबळे आणि नगरसेविका शुभांगी साळुंखेंनी भाजपमध्ये प्रवेश केलाय. आगामी महापालिका निवडणुकीच्या पार्श्वभूमीवर जिल्ह्यात भाजपनं काँग्रेसला मोठा धक्का दिलाय.

भाजपाचे प्रदेशाध्यक्ष रवींद्र चव्हाण यांच्या सांगली जिल्हा भाजपाच्या वतीने सत्कार करण्यात आला आहे. प्रदेशाध्यक्षपदी निवड झाल्यानंतर पहिल्यांदा सांगली जिल्ह्यामध्ये रवींद्र चव्हाण येत असल्याने, भाजपा जिल्हाध्यक्ष सम्राट महाडिक यांच्या नेतृत्वाखाली पेठ नाका येथे सांगली जिल्हा भाजपाच्यावतीने क्रेनच्या माध्यमातून पुष्पहार अर्पण करत जंगी स्वागत करण्यात आले.यावेळी पालकमंत्री चंद्रकांत पाटील यांच्यासह जिल्ह्यातील भाजपा नेते देखील उपस्थित होते.