भरत नागणे, साम टीव्ही

पंढरपूर: आषाढी वारीच्या पार्श्वभूमीवर श्री विठ्ठल रुक्मिणी मंदिर समितीची नियोजन बैठक आज पार पडत असताना काही सामाजिक कार्यकर्त्यांनी गोंधळ घालत जोरदार घोषणाबाजी केली.

बैठकीदरम्यान, काही सामाजिक संघटनांचे पदाधिकारी मंदिर प्रशासनाविरोधात आक्रमक झाले. त्यांनी BVG कंपनीला दिलेला मनुष्यबळ पुरवठ्याचा ठेका रद्द करावा, अशी जोरदार मागणी केली. कार्यकर्त्यांनी असा आरोप केला की, सर्वसामान्य भाविकांच्या देणग्यांमधून कोट्यवधी रुपये खर्च करून ठेका देण्याऐवजी, सेवाभावीवृत्तीने काम करणाऱ्या वारकऱ्यांना सेवक म्हणून संधी द्यावी.

या मागणीसाठी कार्यकर्त्यांनी जोरदार घोषणाबाजी केली होती. यावेळी मंदिरामध्ये तणावाची परिस्थिति निर्माण झाली होती. काही वेळासाठी बैठक अडथळ्यांत सापडली होती. मात्र, पोलिस दाखल झाल्यानंतर परिस्थिती नियंत्रणात आली आणि बैठक पुन्हा सुरू करण्यात आली.