राज्याचे उपमुख्यमंत्री अजित पवार यांच्या नेतृत्वात सध्या राष्ट्रवादी काँग्रेस पक्षाची जन सन्मान यात्रा सुरू आहे, सुरुवातीपासूनच ही यात्रा अजित पवारांच्या गुलाबी रंगाने चर्चेत आली होती, आधी अजितदादांच्या अंगावरील गुलाबी जॅकेट आणि त्यानंतर यात्रेतील गुलाबी रंगाच्या बस सगळ्यांचाच लक्ष वेधून घेत होत्या. मात्र आता तर अजित पवारांनी राष्ट्रवादीच्या पारंपारिक ध्वजाचा रंग देखील बदलला आहे.

हिंगोलीच्या वसमत शहरात जनसन्मान यात्रेच्या प्रमुख मार्गावर राष्ट्रवादी काँग्रेसच्या कार्यकर्त्यांनी राष्ट्रवादीचे चिन्ह असलेल्या घड्याळाच्या चहूबाजूने गुलाबी रंग असलेले ध्वज लावले आहेत. दरम्यान पूर्वी गुलाबी ,केशरी आणि हिरवा रंग असलेला राष्ट्रवादी काँग्रेस पक्षाचा ध्वज देखील आता गुलाबी झाल्याने पुन्हा एकदा अजितदादांच्या गुलाबी रंगाची चर्चा जोरात सुरू झाली आहे.