संदीप नागरे, हिंगोली | साम टीव्ही

मुख्यमंत्री माझी लाडकी बहीण योजना राज्यात सुपरहिट ठरली. मागील विधानसभा निवडणुकीत या योजनेमुळं महायुतीला फायदा झाला. पण या योजनेचा अनेकांनी गैरफायदा घेतल्याचे उघड झालेले आहे. आतापर्यंत लाखो अपात्र लाडक्या बहिणींनी या योजनेचा लाभ घेतला आहे. आता या अपात्र लाडक्या बहिणींच्या खात्यात पैसे जमा होणे बंद झाले आहे. त्यात आता आणखी एक प्रताप उघड झाला आहे.

राज्य सरकारच्या महत्त्वाकांक्षी लाडकी बहीण योजनेचा जिल्हा परिषदेच्या कर्मचाऱ्यांनी लाभ घेतल्याचं समोर आलेय. राज्यभरातील 1183 कर्मचाऱ्यांनी या योजनेचा लाभ घेतल्याची माहिती महिला व बालविकास विभागाने राज्य सरकारला दिलीय. सरकारने या जिल्हा परिषदेच्या कर्मचाऱ्यांवर महाराष्ट्र नागरी सेवा नियमांतर्गत कारवाई करण्याचे आदेश सर्व जिल्हा परिषदेच्या सीईओंना दिले आहेत. हिंगोली जिल्हा परिषदेच्या सीईओ अंजली रमेश यांनी यासंदर्भात तातडीने कारवाई देखील सुरू केलीय.