शनिवारी पंजाब किंग्ज विरूद्ध सनरायझर्स हैदराबाद यांच्यामध्ये सामना रंगला होता. या सामन्यात सनरायझर्स हैदराबादने उत्तम खेळ करत सामना जिंकला. सनरायझर्स हैदराबादने पंजाब किंग्जने दिलेलं २४६ रन्सचं लक्ष्य ९ बॉल शिल्लक असताना पूर्ण केलं आणि ८ विकेट्सने ऐतिहासिक विजय मिळवला. अभिषेक शर्माचे १४१ आणि ट्रॅव्हिस हेडच्या ६६ रॅन्सच्या जीवावर हैदराबादने सामना जिंकला. मात्र या सामन्यात दोन कांगारू खेळाडू भर मैदानात एकमेकांशी भिडले होते.

ट्रेविस हेड फलंदाजी करत असताना पंजाब किंग्जचा खेळाडू आणि त्याचाच आस्ट्रेलियन टीममेट ग्लेन मॅक्सवेलशी जोरदार वाद झाला. इतकंच नाही तर यामध्ये ऑस्ट्रेलियन खेळाडू मार्कस स्टोइनिसनेही या लढतीत उडी घेतली.

काय घडलं नेमकं प्रकरण?

सनरायझर्स हैदराबादच्या डावाच्या ९व्या ओव्हरमध्ये ट्रेव्हिस हेड आणि ग्लेन मॅक्सवेल यांच्यात जोरदार वाद झाला. या ओव्हरचा शेवटचा डॉट बॉल होता. हा बॉल खेळल्यानंतर हेडने रागात मॅक्सवेलला काहीतरी बोलायला सुरुवात केली. यावेळी हेडला इतका राग का आला हे मॅक्सवेलला समजलं नाही. यावेळी मॅक्सवेलही काहीसा चिडला.

दोघांचा वाद पाहता अंपायरने परिस्थिती शांत करण्याचा प्रयत्न केला. परंतु हेड सतत काहीतरी बोलत राहिला. यानंतर पंजाब किंग्जचा भाग असलेला मार्कस स्टोइनिस आला आणि थेट हेडशी काहीतरी बोलू लागला. स्टोइनिस थोडा हसला आणि मग दोघे आपल्या जागेवर गेले. पण हा वाद या डॉट बॉलमुळे नव्हता, तर तो आधीच सुरू झाला होता.

का झाला या दोघांमध्ये वाद?

या ओव्हरच्या पाचव्या बॉलवर दोन्ही ऑस्ट्रेलियन खेळाडूंमध्ये वाद सुरू झाला. याआधी हेडने मॅक्सवेलच्या सलग दोन चेंडूंवर सिक्स लगावले होते. हेडने पाचवा बॉल डिफेन्ड केला. ज्यावेळी बॉल मॅक्सवेलकडे गेला आणि त्याने तो पुन्हा कीपरकडे फेकला. हेडला वाटलं की, बॉल त्याच्या जवळून गेला आहे आणि तो रागाने मॅक्सवेलला काहीतरी म्हणाला.

ट्रॅव्हिस हेडने ३७ चेंडूत ६६ धावांची शानदार खेळी केली, या खेळीत त्याने ३ सिक्स आणि ९ फोर मारले. हेडने अभिषेक शर्मासोबत पहिल्या विकेटसाठी १७१ रन्सची पार्टनरशिप केली. या सामन्यात सनरायझर्स हैदराबादने ८ विकेट्सने विजय मिळवला.