आशिया कप २०२५ मधील लीग सामन्यात भारताने पाकिस्तानवर ७ विकेट्स राखून दणदणीत विजय मिळवला. या शानदार विजयानंतर भारतीय टीमचा कर्णधार सूर्यकुमार यादवने एक महत्त्वपूर्ण आणि भारतीय चाहत्यांच्या मनाला भिडणारं विधान केलं आहे. सूर्यानं हा विजय पहलगाम दहशतवादी हल्ल्यातील पीडितांना अर्पण केला असून त्याचबरोबर भारतीय सैन्याला देखील हा विजय समर्पित केल्याचं म्हटलंय.

पाकिस्तानवर मिळवलेल्या विजयानंतर त्याने स्पष्ट केलं की, हा विजय आपल्या देशाच्या शौर्य आणि पराक्रमाचं प्रतीक आहे.

सूर्यकुमार यादवने दिलं पाकिस्तानला प्रत्युत्तर

आशिया कप २०२५ स्पर्धा संयुक्त अरब अमिरातीत (यूएई) खेळवली जातेय. पाकिस्तानविरुद्धच्या या विजयाला सूर्यकुमार यादवने पहलगाम दहशतवादी हल्ल्यातील पीडितांना अर्पण करून पाकिस्तानला थेट संदेश दिला.

सामन्याच्या सुरुवातीला टॉसदरम्यानही सूर्यकुमार यादवने पाकिस्तानचा कर्णधार सलमान अली आगाशी हस्तांदोलन केलं नाही. एवढंच नव्हे तर सामना संपल्यानंतरही भारतीय खेळाडूंनी पाकिस्तानी खेळाडूंकडे दुर्लक्ष केलं आणि कोणाशीही हात न मिळवता थेट ड्रेसिंग रूममध्ये परतले.

विजय भारतीय सैन्याला समर्पित – सूर्यकुमार यादव

सामन्यानंतर बोलताना सूर्यकुमार यादव म्हणाला, "आम्ही पहलगाम दहशतवादी हल्ल्यातील पीडितांसोबत खंबीरपणे उभे आहोत. हा विजय आम्ही भारतीय सैन्याला अर्पण करतो. त्यांनी दाखवलेल्या साहसामुळे आम्हाला प्रेरणा मिळते. आम्ही सदैव त्यांना मैदानातून अभिमानाची संधी देऊ. जेव्हा जेव्हा संधी मिळेल, तेव्हा त्यांच्या चेहऱ्यावर आनंद आणण्यासाठी आम्ही प्रयत्नशील राहू."

भारताचा पाकिस्तानवर ७ गडी राखून दणदणीत विजय

पाकिस्तानच्या टीम भारतीय गोलंदाजांसमोर गुडघे टेकले. प्रथम गोलंदाजी आणि त्यानंतर फलंदाजीत भारतीय टीमने आपल्या अप्रतिम खेळाची झलक दाखवून पाकिस्तानचा धुव्वा उडवला. पाकिस्तानकडून मिळालेल्या १२८ रन्सच्या लक्ष्याचा पाठलाग भारताने केवळ १५.५ ओव्हर्समध्ये ३ गडी गमावून १३१ रन्स करत सहज गाठला आणि ७ गडी राखून विजय मिळवला.

अभिषेक शर्माची आक्रमक सुरुवात

भारतीय डावाची सुरुवात अभिषेक शर्माने आक्रमक पद्धतीने केली. पाकिस्तानचा मुख्य गोलंदाज शाहीन आफ्रिदी याच्या पहिल्याच दोन बॉलवर एक चौकार आणि एक षटकार ठोकून त्याने आपली धडाकेबाज खेळी दाखवून दिली. शर्माने फक्त १३ चेंडूत ४ चौकार आणि २ षटकारांच्या जोरावर ३१ रन्स केले. तर शुबमन गिल ७ चेंडूत १० रन्स करून बाद झाला.

तिलक वर्मा आणि सूर्यकुमार यादवची भागीदारी

तिसऱ्या विकेटसाठी तिलक वर्मा आणि कर्णधार सूर्यकुमार यादव यांच्यात ५६ रन्सची महत्त्वाची भागीदारी झाली. तिलक वर्माने ३१ चेंडूत ३१ रन्स केले. त्यानंतर सूर्यकुमार यादवने जबाबदारीची खेळी करत टीमला विजयाच्या उंबरठ्यावर नेलं. सूर्यकुमार यादव अखेरपर्यंत नाबाद राहिला. त्याने ३७ चेंडूत १ षटकार आणि ५ चौकारांच्या मदतीने ४७ रन्स केले. विजयाचा षटकार लगावत त्याने सामना संपवला.