Test Twenty Format : टेस्ट, वनडे आणि टी२० असे सध्या आंतरराष्ट्रीय क्रिकेटचे तीन फॉरमॅट आहेत. या तीन अधिकृत फॉरमॅट्ससह क्रिकेटचे आणखी दोन फॉरमॅटही पाहायला मिळतात. द हंड्रेड लीग ही १००-१०० चेंडूंची स्पर्धा आहे, या स्पर्धेलाही टी-२० फॉरमॅटचा दर्जा देण्यात आला आहे. याशिवाय आणखी एक टी-१० असा क्रिकेटचा फॉरमॅट उपलब्ध आहे. आता आंतरराष्ट्रीय क्रिकेटमधील नव्या 'टेस्ट ट्वेंटी' फॉरमॅटची घोषणा करण्यात आली आहे. या फॉरमॅटमध्ये टेस्ट आणि टी२० क्रिकेट यांचे संमिश्रण असेल असे म्हटले जात आहे. क्रिकेटच्या चौख्या फॉरमॅटचे अनावरण देखील करण्यात आले आहे.

मिळालेल्या माहितीनुसार, क्रिकेटमध्ये नवीन फॉरमॅट उपलब्ध करुन देण्यात आला आहे. या फॉरमॅटचे नाव टेस्ट ट्वेंटी असे असेल. नावावरुनच या फॉरमॅटमध्ये टेस्ट क्रिकेट आणि टी२० क्रिकेट एकत्रितपणे खेळले जाईल. या फॉरमॅटमधील स्पर्धा १९ वर्षांखालील खेळाडूंसाठी असेल. ही स्पर्धा पुढच्या वर्षी जानेवारीमध्ये भारतात खेळली जाण्याची शक्यता आहे.

वेस्ट इंडियन संघाचे दिग्गज कर्णधार सर क्लाईव्ह लॉइड, भारतीय माजी फिरकीपटू हरभजन सिंह, ऑस्ट्रेलियन दिग्गज फलंदाज मॅथ्यू हेडन आणि दक्षिण आफ्रिकेचा माजी खेळाडू एबी डिव्हिलियर्स हे या लीगशी संलग्न असणार आहेत. भारतीय शिल्पकार गौरव बहिरवानी यांनी राजस्थान रॉयल्सचे माजी सीईओ मायकल फोर्डहॅम यांच्या सहकार्याने ही लीग सुरु करण्याची योजना आखली आहे.

टेस्ट ट्वेंटी फॉरमॅट कसा असेल?

आयोजकांच्या मते, टेस्ट ट्वेंटी फॉरमॅटमधील स्पर्धा जानेवारी २०२६ मध्ये सुरु होईल. सामन्यामध्ये चार ब्रेक असतील. हा सामना ८० ओव्हर्सचा असेल. प्रत्येक संघाला ४० ओव्हर्स खेळावे लागतील. प्रत्येक डावात २० ओव्हर्स असतील. जर एखादा संघ पहिल्या डावात ७५ धावांनी पिछाडीवर असेल तर त्यांना फॉलोऑन करावे लागेल. स्पर्धेमध्ये ९६ खेळाडू सहभागी होतील, सुरूवातीच्या हंगामात स्पर्धेत सहा संघ असतील.