ट्रेकिंग करताना पक्षाघात, पण ८४ वर्षीय करवंदे काका हरले नाहीत; १७०६ वेळा सर केला सिंहगड किल्ला!

सचिन जाधव साम टीव्ही, प्रतिनिधी

Pune Sinhgad : उत्तुंग इच्छाशक्तीपुढे आकाशही ठेंगणे होते या म्हणीचा प्रत्यय पुण्यातील सिंहगडावर आला. ८४ वर्षीय विकास करवंदे यांनी त्याच्या आयुष्यातील १ हजार ७०६ वी सिंहगड वारी पूर्ण केली. आश्चर्याची बाब म्हणजे वयाच्या ५३ व्या वर्षी ते पहिल्यांदा सिंहगडावर चढले होते. एक छंद म्हणून सुरुवात केलेला गडविहाराचा करवंदे यांचा प्रवास अजूनही सुरू आहे.

एव्हरेस्ट शिखरावर चढाई करण्यासाठी पूर्वतयारी करायची असेल, तर आधी सिंहगडाच्या चढाईचा सराव केला जातो असे म्हटले जाते. इतके महत्त्व सिंहगडावरील चढाईला आहे. या सिंहगडावर आज (१८ ऑक्टोबर) ८४ वर्षीय विकास करवंदे यांनी एक हजार सातशे सहाव्यांदा यशस्वीपणे चढाई केली. या कृतीने त्यांनी सर्वांचे लक्ष्य वेधले आहे.

विकास करंवदे यांनी वयाच्या ५३ व्या वर्षी पहिली सिंहगड वारी केली होती. तेव्हापासून ते दर आठवड्याला दोनदा म्हणजेच गुरुवारी आणि रविवारी सिंहगड चढत आहेत. त्यांचा हा तप मागील तीन दशकांपासून सुरु आहे. मागील ३० वर्षांपासून त्यांनी तब्बल १ हजार ७०६ वेळा सिंहगड सर केला आहे. बँकेत नोकरी करत असताना विकास करवंदे यांनी हा छंद अजूनही जोपासला आहे.

दोन वर्षांपूर्वी हिमालयामध्ये 'पिंटारी ट्रेक' दरम्यान विकास करवंदे यांना पक्षाघाताचा त्रास झाला होता. या आजारावर मात करत त्यांनी पुन्हा चढाई सुरू ठेवली. सिंहगडावरील व्यायामप्रेमींच्या सोबत त्यांनी ऊन, वारा, पाऊस कोणत्याही परिस्थितीमध्ये चिकाटीने सिंहगड किल्ल्यावरील चढाई सुरू ठेवली. हा छंद यापुढेही जपणार असल्याचे करवंदे यांनी म्हटले आहे.