भाजप प्रवेश लटकला अन् सावंताचे मन बदललं, सोलापूरचं राजकारण ३६० डिग्री बदलणार

भारत नागणे, साम टीव्ही, प्रतिनिधी

Maharashtra Political News : शिवसेना शिंदे गटाचे माजी मंत्री आणि आमदार तानाजी सावंत यांचे बंधू आणि शिवसेनेचे माजी जिल्हा संपर्कप्रमुख शिवाजी सावंत यांचा भारतीय जनता पक्षातील प्रक्षप्रवेश लांबणीवर पडला आहे. भाजप पक्षप्रवेश लटकला असल्याने शिवाजी सावंतांनी अन्य पर्याय खुले असल्याचे जाहीर केले आहे. त्यांच्या या विधानाची चर्चा आहे.

सोलापूर जिल्ह्यातील चार माजी आमदार भारतीय जनता पक्षामध्ये जाणार असल्याची चर्चा सुरू आहे. या चर्चेला खुद्द पालकमंत्री जयकुमार गोरे यांनीही दुजोरा दिला आहे. यादरम्यान मागील अनेक दिवसांपासून भाजप पक्षप्रवेशाच्या प्रतीक्षेत असलेल्या प्राध्यापक शिवाजी सावंत यांचे नाव मात्र कुठेही चर्चेत नसल्याचे पाहायला मिळत आहे.

मागून येणाऱ्यांच्या पक्षप्रवेशाबाबत चर्चा सुरु असल्याने शिवाजी सावंत अस्वस्थ झाले आहेत. त्यांच्या पक्षप्रवेशाबाबत मुख्यमंत्री देवेंद्र फडणवीस यांनी पालकमंत्री जयकुमार गोरे यांच्याशी यापूर्वीही चर्चा केली आहे. पण त्यांना पक्ष प्रवेशासंदर्भात हिरवा कंदील मिळाला नसल्याचे म्हटले जात आहे. यामुळे शिवाजी सावंत यांचा पक्षप्रवेश लांबणीवर पोहोचला आहे.

इतर माजी आमदारांना लवकरच पक्ष प्रवेश दिला जाईल असे पालकमंत्री जयकुमार गोरे यांनी जाहीर केले आहे. प्रवेशासंदर्भात अडथळे येत असल्याने शिवाजी सावंत यांनी नाराजी व्यक्त केला. भाजपने सकारात्मक प्रतिसाद दिला नाही, तर आपल्यासाठी अन्य पर्याय देखील खुले असल्याचे शिवाजी सावंत यांनी जाहीर केले आहे.