१८६ महागड्या कार खरेदी करत २१ कोटी रुपयांची बचत, गुजरातमध्ये जैन समाजाने लढवली अजब शक्कल; प्रकरण काय?

Viral : गुजराती लोक हे नेहमीच व्यावसायिक कौशल्य आणि दूरदर्शी विचारसरणीसाठी ओळखले जातात. पैसे कमवण्यापेक्षा योग्य पद्धतीने पैसे खर्च करणे ही एक कला असल्याचे त्यांनी एका कृतीतून दाखवून दिले आहे. जैन समाजाची संघटना असलेल्या जैन आंतरराष्ट्रीय व्यापार संघटना म्हणजेच JITO तील सदस्यांनी एकत्रितपणे महागड्या कार खरेदी करत २१ कोटी रुपयांपेक्षा जास्त पैशांची बचत केली.

JITO च्या नेतृत्वाखाली देशभरातील १८६ सदस्यांनी संयुक्तपणे ऑडी, बीएमडब्ल्यू आणि मर्सिडीज सारख्या ब्रँडच्या लक्झरी कार खरेदी केल्या. या सर्व कारच्या किमती ६० लाख रुपयांपासून ते १.३४ कोटी रुपयांपर्यंत होत्या. खरेदीमध्ये अहमदाबाद आणि गुजरातमधील इतर अनेक शहरांमधील जैन कुटुंबांनी उत्साहाने सहभाग घेतला. जेव्हा एकत्र खरेदी करतो तेव्हा ब्रँडना एकाच वेळी मोठ्या विक्रीचा फायदा होतो, असे JITO चे उपाध्यक्ष हिमांशू शाह यांनी स्पष्ट केले.

जेव्हा आपण एकत्रितपणे खरेदी करुन तेव्हा त्याच्या बदल्यात कंपन्या विशेष सवलती देण्यास तयार असतात. यामुळे समाजातील, संघटनेमधील सदस्यांना लक्षणीय सवलती मिळतात. याशिवाय कंपनीचा अतिरिक्त जाहिरातीचा खर्च देखील वाचतो, असेही हिमांशू शाह यांनी सांगितले. सामूहिक खरेदीमध्ये १४९.५४ कोटी रूपयांच्या किमतीच्या लक्झरी कार खरेदी करण्यात आल्या आणि २१.२२ कोटी रुपयांची बचत झाल्याचे शाह यांनी सांगितले.

या मॉडेलपासून प्रेरणा घेत गुजरातमधील भरवाड समाजाने एकत्रितपणे खरेदी केली. भरवाड युवा संघटना गुजरातने एकत्रितपणे तब्बल १२१ जेसीबी मशीन खरेदी केल्या. यामुळे त्यांना प्रत्येक मशीनला अंदाज ३.३ लाख रुपयांची सूट मिळाली. एकत्र खरेदी केल्याने संघटनेने अंदाजे ४ कोटी रुपयांची बचत केल्याचे म्हटले जात आहे.