Sunil Gavaskar Statement On KL Rahul:

भारतीय संघातील यष्टिरक्षक फलंदाज केएल राहुलला आशिय चषक २०२३ स्पर्धेसाठी भारतीय संघात स्थान दिलं गेलं आहे. मात्र अजूनही पूर्णपणे फिट होऊ न शकल्याने तो सुरुवातीच्या २ सामन्यांमधून बाहेर राहणार आहे.

भारतीय संघ आपला पहिला सामना पाकिस्तान संघाविरूद्ध खेळणार आहे. या सामन्यात केएल राहुल खेळताना दिसून येणार नाही. दरम्यान निवडकर्त्यांनी आता केएल राहुलचा पर्याय शोधावा असा सल्ला सुनील गावसकर यांनी दिला आहे.

सुनील गावसकर यांनी स्टार स्पोर्ट्सवर बोलताना म्हटले की, 'मला असे वाटते की, तो गेला नाही कारण, त्याला त्याच फिजिओबरोबर उपचार सुरू ठेवायचे आहेत जे NCA मध्ये त्याला पाहत होते. तो ५ सप्टेंबरपूर्वी कुठलाच सामना खेळणार नाही. मग तुम्ही त्याच्या परिस्थितीचे मुल्यांकन कसे करणार आहात? सराव सामने आणि मॅच फिटनेस ही पुर्णपणे वेगळी गोष्ट आहे. त्यामुळे मला असं वाटतं की, निवड समितीसाठी निर्णय घेणं कठीण असेल.'

सुनील गावसकरांचं स्पष्ट मत आहे की, निवडकर्त्यांनी केएल राहुलच्या पुढे जाऊन विचार करायला हवा. याबाबत बोलताना ते म्हणाले की, 'तो दर्जेदार खेळाडू आहे, मात्र सामन्यात असं होत नसेल तर अडचणी वाढू शकतात.

याचं उत्तर तुम्हाला सुरुवातीच्या २ सामन्यांमध्ये मिळू शकतं, अशा परिस्थितीत तुम्हाला केएल राहुलच्या पर्यायी खेळाडूचा विचार करावा लागेल. हे निराशाजनक असेल, मात्र हे सत्य आहे.' (Latest sports updates)

'तुम्ही त्याच्याबाबत रिस्क घेऊ शकत नाही. मी देखील त्याला संघात घेण्याच्या बाजूने आहे. कारण सत्य हे आहे की, तो दर्जेदार खेळाडू आहे. जर वर्ल्डकप सुरू होण्यापूर्वी तो सामना खेळण्यासाठी फिट नसेल तर मला असं वाटतं की, त्याला स्वत:ला वर्ल्डकपच्या संघात ठेवणं कठीण होईल.'