Chennai Super Kings vs Mumbai Indians: आयपीएलच्या १६ व्या हंगामातील ४९ वा सामना चेन्नईच्या चिदंबरम स्टेडियममध्ये मुंबई इंडियन्स आणि चेन्नई सुपर किंग्ज यांच्यात रंगणार आहे. मुंबईचा कर्णधार रोहित शर्मा आणि चेन्नईचं नेतृत्व करणारा एम एस धोनी आमनेसामने आहेत. CSK ने नाणेफेक जिंकून प्रथम गोलंदाजीचा निर्णय घेतला.

चेन्नईने संघात कोणताच बदल केलेला नसला तरी मुंबईने कुमार कार्तिकेया व तिलक वर्मा यांना प्लेइंग इलेव्हनमधून बाहेर बसवले आहे. राघव आज पदार्पण करतोय, तर त्रिस्ताना स्तब्सला संधी मिळाली आहे. (Latest Marathi News)

चेन्नईच्या गोलंदाजापुढे मुंबईची दाणादाण...

सामन्यात चेन्नईच्या गोलंदाजीपुढे मुंबईचे सलामीचे फलंदाज चांगलेच ढेपाळल्याचे पाहायला मिळाले. चेन्नई सुपर किंग्जचा वेगवान गोलंदाज दिपक चहर आणि तुषार देशपांडेनं पॉवर प्ले मध्ये मुंबईच्या तीन फलंदाजांना बाद केलं. दिपकने कर्णधार रोहित शर्माला शून्यावर झेलबाद केलं. तसंच सलामीवीर फलंदाज कॅमरून ग्रीनला ६ धावांवर क्लीन बोल्ड केलं, तिसऱ्या षटकात दिपक चहरच्या गोलंदाजीवर ईशान किशन ७ धावांवर बाद झाला.

रोहितने सलामीला आज इशान किशनसह कॅमेरून ग्रीनला मैदानावर पाठवले अन् सर्वांना आश्चर्याचा धक्का बसला. रोहित २०१८ साली दिल्ली कॅपिटल्सविरुद्ध पाचव्या क्रमांकावर फलंदाजीला आला होता आणि ६२ इनिंग्जनंतर आज तो सलामीला खेळत नाही. कॅमेरून ग्रीनला प्रमोशन देऊन फार फायदा झालेला नाही.

महेंद्रसिंग धोनी हेल्मेट घालून किपींगला पुढे उभा राहिला अन् त्यामुळे रोहितवर दडपण आले. त्यामुळेच त्याच्या हातून चुकीचा फटका मारला गेला अन् तो भोपळ्यावर बाद झाला. त्याचा फटकाही इतका खराब होता की, तो पाहून सर्वच चकित झाल्याचे पाहायला मिळाले.

नावावर झाला नकोसा विक्रम...

यासोबतच आयपीएलमध्ये सर्वाधिक वेळा 0 धावांवर बाद होण्याचा नकोसा विक्रम त्याच्या नावावर नोंदवला गेला. एवढेच नाही तर तो आयपीएलमध्ये सर्वाधिक वेळा बाद होणारा कर्णधार बनला आहे. कर्णधार म्हणून रोहित ११व्यांदा शून्यावर बाद झाला. त्याने गौतम गंभीरला (10) मागे सोडले.