टीम इंडियाने उल्लेखनीय कामगिरी करत २०२६ च्या टी-२० वर्ल्ड कपच्या सेमी फायनलचं तिकीट मिळवलंय. या ऐतिहासिक विजयाचा खरा हिरो संजू सॅमसन ठरला. त्याने १९८ च्या स्ट्राईक रेटने फलंदाजी करताना ९७ धावांची नाबाद खेळी केली. त्याच्या शानदार खेळीमुळे टीम इंडियाने ५ विकेट राखत वेस्ट इंडिजला पराभूत केलं.

संजू स्पर्धेच्या सुरुवातीला डावाची सुरुवात करण्यासाठी तो सलामीचा फलंदाज म्हणून पहिला पर्याय नव्हता, परंतु महत्त्वाच्या सामन्यांमध्ये तो सलामीसाठी आला आणि त्याने अखेरपर्यत मैदानात राहत ऐतिहासिक विजय मिळवला.

संजूच्या शानदार खेळीचे रहस्य काय?

टीम इंडियाच्या विजयानंतर मुख्य प्रशिक्षक गौतम गंभीर आनंदी झाला आहे. "संजू सॅमसनने टी-२० आंतरराष्ट्रीय सामन्यांमध्ये तीन शतके झळकावली आहेत. आम्हाला त्याची प्रतिभा नेहमीच माहित होती.

न्यूझीलंडविरुद्धच्या मालिकेत त्याने चांगली कामगिरी केली नव्हती. म्हणून त्याला विश्रांती घेणे महत्वाचे होते, परंतु आम्हाला माहित होते की जेव्हा जेव्हा त्याची गरज असेल तेव्हा तो येईल आणि कामगिरी करेल. संजू हा एक जागतिक दर्जाचा खेळाडू आहे. जेव्हा संघाला त्याची सर्वात जास्त गरज होती तेव्हा तो भक्कमपणे उभा राहिला."

संजू सॅंमसनचा खराब फॉर्म

या स्पर्धेपूर्वी टीम इंडियाने न्यूझीलंडविरुद्ध पाच सामन्यांची टी-२० मालिका खेळली. या मालिकेत संजू सॅमसनकडून चांगल्या धावा करता आल्या नाहीत. त्याने पाच सामन्यांमध्ये फक्त ४६ धावा केल्या होत्या. यामुळे संजूला टी२० वर्ल्ड कपच्या सुरुवातीच्या सामन्यांमध्ये विश्रांती देण्यात आली होती.

दरम्यान अभिषेक आजारी पडल्यानंतर त्याला अमेरिकेविरुद्ध संधी मिळाली. त्यानंतर त्याला नामिबिया आणि नंतर झिम्बाब्वेविरुद्धच्या सामन्यांमध्ये मैदानात उतरवण्यात आले. या विश्वचषकातील त्याचा तिसरा सामना होता. या सामन्यात संजूने नाबाद ९७ धावा केल्या. त्याने आता तीन डावांमध्ये १४३ धावा केल्या आहेत.