T20 World Cup 2022 : क्रिकेट हा अनिश्चिततेचा खेळ आहे आणि त्याची प्रचिती टी २० वर्ल्डकपमध्ये येत आहे. आतापर्यंत पाच सामन्यांत धक्कादायक निकाल लागले आहेत. २७ ऑक्टोबरला पाकिस्तान विरुद्ध झिम्बाब्वे यांच्यात झालेल्या सामन्याचा निकालही धक्कादायक होता. तुलनेने कमकुवत असलेल्या झिम्बाब्वेने पाकिस्तानला पराभूत केलं. त्यामुळे पाकिस्तान संघातील खेळाडूंबद्दल माजी क्रिकेटपटूंमध्ये प्रचंड राग आहे.

पाकिस्तानचा (Pakistan) माजी वेगवान गोलंदाज शोएब अख्तरही प्रचंड चिडला आहे. पाकिस्तानच्या पराभवाचा राग त्यानं टीम इंडियावर (Team India) काढला आहे. त्याने टीम इंडियाविरोधात विखारी टिप्पणी केली आहे. मी आधीच सांगितलंय की, पाकिस्तान या आठवड्यात वर्ल्डकप स्पर्धेतून मायदेशी परतणार आहे आणि टीम इंडिया पुढच्या आठवड्यात सेमिफायनलचा सामना खेळून स्पर्धेबाहेर जाईल, ते कुणी तीस मार खां नाहीत, असं शोएब म्हणाला.

टीम इंडियाची कामगिरी आतापर्यंत तरी लय भारी झालीय. ग्रुप २ मध्ये दोन्ही सामने जिंकून गुणतालिकेत अव्वल स्थानी आहे. (Cricket News)

झिम्बॉब्वेने रचला इतिहास

पाकिस्तानविरुद्धच्या सामन्यात झिम्बाब्वेने प्रथम फलंदाजी करताना २० षटकांत ८ विकेट गमावून १३० धावा केल्या. माफक आव्हान असलं तरी, पाकिस्तानला ते पार करणं जमलं नाही आणि अवघ्या एका धावेने पराभूत व्हावे लागले.

झिम्बाब्वेने गोलंदाजी आणि क्षेत्ररक्षणही चांगले केले. त्यामुळे त्यांना विजय साकारता आला. या विजयानंतर आता पाकिस्तान टीम व्यवस्थापन आणि कर्णधार बाबर आझमवर टीका होत आहे.