Pankaj Advani:

भारताचा स्टार खेळाडू पंकज अडवाणी याने मंगळवारी (२१ नोव्हेंबर) झालेल्या स्पर्धेत भारताच्या सौरव कोठारीला पराभूत केलं आहे. पंकजने सौरवला पराभूत करत जागतिक बिलियर्ड्स अजिंक्यपद स्पर्धेत जेतेपदाला गवसणी घातली आहे. हे त्याच्या कारकिर्दीतील २६ वे जेतेपद ठरले आहे.

पंकज अडवाणीने आतापर्यंत ९ वेळेस विश्वविजेता होण्याचा मान पटकावला आहे. २००५ मध्ये त्याने पहिल्यांदा या स्पर्धेच्या जेतेपदावर नाव कोरलं होतं. गुणांच्या प्रकारात त्याने ८ विश्वविजेता होण्याचा मान पटकावला आहे. यासह त्याने एक वेळेस जागतिक सांघिक बिलियर्ड्स अजिंक्यपद स्पर्धेच्या जेतेपदावर नाव कोरलं आहे. (Latest sports updates)

पंकज अडवाणीने उपांत्य फेरीच्या लढतीत रुपेश शाहला ९००-२७३ इतक्या गुणांनी धूळ चारली होती. तर दुसरीकडे सौरवने उपांत्य फेरीत ध्रुव सितवालावर ९००-७५३ गुणांच्या फरकाने विजय मिळवला होता. तसेच या स्पर्धेच्या अंतिम सामन्यात पंकज अडवाणीने सौरव कोठारीवर १०००-४१६ गुणांच्या फरकाने विजय मिळवला आहे.