चेन्नईतील चेपॉकच्या मैदानावर आयपीएल २०२४ स्पर्धेतील क्वालिफायर २ चा सामना रंगणार आहे. या सामन्यात सनरायझर्स हैदराबाद आणि राजस्थान रॉयल्स हे दोन्ही संघ आमने सामने येणार आहेत. हा सामना दोन्ही संघांसाठी अतिशय महत्वाचा असणार आहे. कारण हा सामना जिंकणारा संघ थेट आयपीएल स्पर्धेच्या फायनलमध्ये प्रवेश करणार आहे. दरम्यान कसा राहिलाय दोन्ही संघांचा हेड टू हेड रेकॉर्ड? जाणून घ्या.

हा सामना दोन्ही संघांसाठी करो या मरो सामना असणार आहे. त्यामुळे दोन्ही संघांमध्ये जोरदार लढत पाहायला मिळणार यात काहीच शंका नाही. या दोन्ही संघांच्या हेड टू हेड रेकॉर्डबद्दल बोलायचं झालं, तर दोन्ही संघ १९ वेळेस आमनेसामने आले आहेत. यादरम्यान सनरायझर्स हैदराबादने १० सामने जिंकले आहेत. तर राजस्थान रॉयल्स संघाला केवळ ९ सामन्यांमध्ये विजय मिळवता आला आहे.

क्वालिफायर १ मध्ये पराभव

क्वालिफायर १ चा सामना कोलकाता नाईट रायडर्स आणि सनरायझर्स हैदराबाद या दोन्ही संघांमध्ये रंगला. या सामन्यात हैदराबादचा संघ पूर्णपणे फ्लॉप ठरला. या संघाला प्रथम फलंदाजी करताना अवघ्या १६० धावा करता आल्या. या धावांचा पाठलाग करताना कोलकाता नाईट रायडर्स संघाने ३८ चेंडू शिल्लक ठेऊन सामना जिंकला. आता हैदराबादकडे दुसऱ्यांदा फायनलमध्ये जाण्याची संधी असणार आहे. तर दुसरीकडे राजस्थानने एलिमिनेटरच्या सामन्यात रॉयल चॅलेंजर्स बंगळुरु संघाला पराभूत केलं.

कोण मारणार बाजी?

क्वालिफायर २ च्या सामन्यात दोन्ही संघामध्ये जोरदारल लढत होण्याची शक्यता वर्तवली जात आहे. कारण हा सामना जिंकून दोन्ही संघांना फायनलमध्ये जाण्याची संधी असणार आहे. राजस्थान रॉयल्स संघाकडे अनुभवी फिरकी गोलंदाज आहेत. चेन्नईची खेळपट्टी ही फिरकी गोलंदाजीसाठी अनुकूल आहे. त्यामुळे राजस्थान रॉयल्स संघाकडे झुकतं माप असणार आहे. तर हैदराबादची फलंदाजी मजबूत आहे.