पाकिस्तानचा संघ दक्षिण आफ्रिका दौऱ्यावर आहे. दोन्ही संघांमध्ये टी -२० मालिकेचा थरार सुरू आहे. या मालिकेत बाबर आझमवर सर्वांच लक्ष असणार आहे. मात्र पहिल्याच सामन्यात त्याने इज्जत घालवली आहे.

संघात कमबॅक करताच तो शून्यावर माघारी परतला आहे. मुख्य बाब म्हणजे त्याला १८ वर्षीय गोलंदाजाने बाद करत माघारी धाडलं आहे. यासह त्याने आपल्या फ्लॉप फलंदाजीचं सत्र सुरुच ठेवलं आहे.

या सामन्याबद्दल बोलायचं झालं तर, दक्षिण आफ्रिकेने नाणेफेक जिंकून प्रथम फलंदाजी करण्याचा निर्णय घेतला. पाकिस्तानचा संघ गोलंदाजीला आला. या डावात गोलंदाजी करताना पाकिस्तानने दमदार सुरुवात केली.

अवघ्या २८ धावांवर पाकिस्तानचे ३ फलंदाज माघारी परतले होते. इथपर्यंत पाकिस्तानचा संघ मजबूत स्थितीत होता. इथून पुढे डेव्हिड मिलरने कहर केला. त्याने ४० चेंडूंचा सामना करत ४ चौकार आणि ८ षटकार खेचत ८२ धावांची तुफानी खेळी केली.

डेव्हिड मिलरसह जॉर्ज लिंडेने देखील तुफान फटकेबाजी केली. त्याने या डावात २४ चेंडूंचा सामना करत ४८ धावांची खेळी केली. या खेळीदरम्यान त्याने ४ षटकार आणि ३ चौकार मारले. दक्षिण आफ्रिकेने पाकिस्तानसमोर विजयासाठी १८४ धावांचे आव्हान ठेवले.

पाकिस्तानला हा सामना जिंकण्यासाठी १८४ धावा करायच्या होत्या. या धावांचा पाठलाग करताना कर्णधार मोहम्मद रिझवान आणि बाबर आझम दोघेही फलंदाजीला उतरले. दक्षिण आफ्रिकेकडून युवा वेगवान गोलंदाज क्वेना मफाका गोलंदाजीला आला. मफाकाने आपल्या तिसऱ्याच चेंडूवर बाद केलं. पाकिस्तानने हा सामना ११ धावांनी गमावला. यासह दक्षिण आफ्रिकेने या मालिकेत १-० ने आघाडी घेतली आहे.