न्यूयॉर्कच्या नासाऊ काऊंटी क्रिकेट स्टेडियमवर भारत आणि अमेरिका हे दोन्ही संघ आमनेसामने आले होते.या सामन्यात भारतीय संघाने घरच्या मैदानावर अमेरिकेचा ७ गडी राखून पराभव केला आहे. हा भारतीय संघाचा या हंगामातील सलग तिसरा विजय ठरला आहे. या विजयासह भारतीय संघाने सुपर ८ फेरीत धडक दिली आहे. दरम्यान सामन्यानंतर मुलाखत घेत असलेल्या रवी शास्त्रींनी रोहित शर्माला बोरीवली बॉईज बाबत प्रश्न विचारला, यावर रोहितने हटके उत्तर दिलं आहे.

अमेरिकेला नमवल्यानंतर रोहित शर्मा म्हणाला की, ' हा सामना जिंकणं कठीण जाईल, याची कल्पना होतीच. पण दुबे आणि सूर्याने संयमी खेळी केली आणि भागीदारी करत संघाला विजय मिळवून दिला. '

यासह रोहितने अमेरिकेकडून खेळत असलेल्या भारतीय खेळाडूंचं तोंडभरून कौतुकही केलं. रवी शास्त्रींनी बोरीवली बॉईजबाबत प्रश्न विचारला, त्यावेळी रोहित म्हणाला की,' यापैकी बरेच खेळाडू आहेत ज्यांच्यासोबत मी क्रिकेट खेळलो आहे. या खेळाडूंची प्रगती पाहून खरंच आनंद होतोय. या खेळाडूंना गेल्यावर्षी एमएलसीमध्ये( मेजर लीग क्रिकेट) खेळताना पाहिलं होतं. हे सर्वच खेळाडू मेहनती आहेत.'

अमेरिकेचा निम्म्यापेक्षा अधिक संघ हा भारतीय खेळाडूंनी भरलेला आहे. सौरभ नेत्रावलकर, नितीश कुमार, हरमीत सिंग आणि जसदीप सिंगसारख्या खेळाडूंचा समावेश आहे. सौरभ नेत्रावलकर आणि सूर्यकुमार यादव हे दोघेही मुंबईच्या अंडर १५ संघाकडून एकत्र खेळले आहेत.

त्यानंतर २०१० मध्ये तो भारतीय संघाकडून अंडर १९ वर्ल्डकप खेळण्यासाठी मैदानावर उतरला होता. त्यावेळी त्याला केएल राहुल, मयांक अगरवाल आणि संदीप शर्मासारख्या स्टार खेळाडूंसोबत खेळण्याची संधी मिळाली होती. तर हरमीत सिंग आणि रोहित शर्मा हे दोघेही एकाच शाळेत होते.

तसेच रोहित पुढे म्हणाला की, अर्शदीप सिंगने अप्रतिम गोलंदाजी केली. आम्हाला गोलंदाजीतील पर्याय पाहायचे होते. त्यामुळे शिवम दुबेला गोलंदाजी करण्याची संधी दिली. सुपर ८ मध्ये पोहोचणं दिलासा देणारं आहे. मात्र या मैदानावर खेळणं मुळीच सोपं नव्हतं. या मैदानावर सामना कुठल्याही संघाच्या दिशेने फिरू शकत होता.'