Rohit Sharma Statement:

आयसीसी वनडे वर्ल्डकप २०२३ स्पर्धेत भारतीय संघाने इंग्लंडवर जोरदार विजय मिळवला. या सामन्यात भारतीय संघाने १०० धावांनी विजय मिळवला. प्रथम फालंदाजी करताना भारतीय संघाने २२९ धावा केल्या होत्या.

या धावांचा पाठलाग करताना इंग्लंडचा डाव अवघ्या १२९ धावांवर संपुष्टात आला. हा सामना जिंकून देण्यात भारतीय गोलंदाजांनी मोलाची भूमिका बजावली. दरम्यान हा सामना झाल्यानंतर भारतीय कर्णधार रोहित शर्माने मोठं वक्तव्य केलं आहे.

हा सामना झाल्यानंतर रोहित शर्मा म्हणाला की, ' हा एक असा सामना होता ज्यात सर्वांनीच सर्वोत्तम खेळ करत मोलाचं योगदान दिलं. आमच्या संघातील वरिष्ठ खेळाडूंनी योग्यवेळी उत्तम अप्रतिम कामगिरी करत संघाला विजय मिळवून दिला. सुरुवातीच्या ५ सामन्यांमध्ये आम्ही धावांचा पाठलाग केला. या सामन्यात आम्हाला धावांचा बचाव करण्याची संधी मिळाली. सुरुवातीला या खेळपट्टीवर फलंदाजी करणं कठीण जात होतं. विरोधी संघातील गोलंदाजांनी देखील अप्रतिम गोलंदाजी केली. '

भारतीय फलंदाजीबद्दल बोलताना तो म्हणाला की, ' आम्ही फलंदाजीत दमदार कामगिरी करू शकलो नाही. सुरुवातीचे ३ फलंदाज स्वस्तात माघारी परतले. संघ जेव्हा अशा स्थितीत फसतो तेव्हा एका मोठ्या भागीदारीची गरज असते. आम्हाला त्यात यश आलं. जेव्हा आमचा डाव संपला तेव्हा आम्हाला असं वाटत होतं की, आम्ही ३० धावा कमी केल्या आहेत.' (Latest sports updates)

वेगवान गोलंदाजांच केलं कौतुक..

भारतीय संघातील वेगवान गोलंदाजांबाबत बोलताना तो म्हणाला की, ' असे गोलंदाज तुम्हाला दररोज पाहायला मिळत नाही. जेव्हा डाव सुरू होतो तेव्हा तुम्हाला वेगवान गोलंदाजांकडून अशी अपेक्षा असते की, त्यांनी विकेट्स काढून द्यावं. आमच्या गोलंदाजांकडे अनुभव आहे आणि ती क्षमता आहे. फक्त त्यांना पाठिंबा देण्याची गरज आहे. आज त्यांनी अशीच काही कामगिरी केली आहे.