R Ashwin Record In IND vs WI 2nd Test: भारत आणि वेस्टइंडीज या दोन्ही संघांमध्ये २ कसोटी सामान्यांची मालिका सुरु आहे. मालिकेतील दुसरा कसोटी सामना पोर्ट ऑफ स्पेनच्या मैदानावर सुरु आहे. या सामन्यात भारतीय संघाकडून विराट कोहली आणि रोहित शर्माने दमदार कामगिरी केली आहे.

तर आर अश्विनने देखील अर्धशतक झळकावल्याचे पाहायला मिळाले आहे. या खेळीसह त्याच्या नावे मोठ्या विक्रमाची नोंद झाली आहे.

भारतीय संघाने पहिल्या डावात फलंदाजी करताना ४३८ धावांचा डोंगर उभारला आहे. भारतीय संघाकडून ४ फलंदाजांनी अर्धशतके झळकावली आहेत. ज्यात आर अश्विनचा देखील समावेश आहे. त्याने वेस्टइंडीजच्या गोलंदाजांचा चांगलाच समाचार घेत ५६ धावांची खेळी केली.

या खेळीसह तो भारतीय संघासाठी सहाव्या किंवा त्यापेक्षा खालच्या क्रमांकावर फलंदाजी करताना सर्वाधिक धावा करणारा तिसरा फलंदाज ठरला आहे. त्याने माजी भारतीय खेळाडू व्हीव्हीएस लक्ष्मणचा रेकॉर्ड मोडून काढला आहे.

आर अश्विनने भारतीय संघासाठी सहाव्या किंवा त्यापेक्षा खालच्या क्रमांकावर फलंदाजी करताना ३१६२ धावा केल्या आहेत.

तर व्हीव्हीएस लक्ष्मणने या क्रमांकावर ३१०८ धावा केल्या होत्या. आर अश्विनच्या पुढे आता केवळ एमएस धोनी आणि कपिल देव आहेत. एमएस धोनीने या क्रमांकावर खेळताना ४७१७ धावा केल्या होत्या. तर कपिल देवने ५११६ धावा केल्या होत्या. (Latest sports updates)

कसोटी क्रिकेटमध्ये ६ किंवा त्यापेक्षा खालच्या क्रमांकावर खेळताना सर्वाधिक धावा करणारे भारतीय फलंदाज..

कपिल देव- ५५१६ धावा

एमएस धोनी- ४७१७ धावा

आर अश्विन - ३११२ धावा

व्हीव्हीएस लक्ष्मण- ३१०८ धावा

रविंद्र जडेजा- २६९६ धावा

भारतीय संघाची दमदार सुरूवात..

भारतीय संघाकडून प्रथम फलंदाजी करताना कर्णधार रोहित शर्माने ८० धावांची खेळी केली. तर यशस्वी जयस्वालने ५७ धावांचे योगदान दिले.

या दोघांनी मिळून १३९ धावांची भागीदारी केली. तसेच विराट कोहलीने १२१ धावांची खेळी केली. शेवटी रविंद्र जडेजाने ६१ आणि आर अश्विनने ५६ धावांचे योगदान दिले. भारतीय संघाचा पहिला डाव ४३८ धावांवर संपुष्टात आला.

या धावांचा पाठलाग करण्यासाठी आलेल्या वेस्टइंडीज संघाने दुसऱ्या दिवसाखेर १ गडी बाद ८६ धावा केल्या आहेत. कर्णधार ब्रेथवेट ३७ धावांवर नाबाद आहे.