आयसीसी चॅम्पियन्स ट्रॉफी २०२५ स्पर्धेत भारतीय संघाचा बोलबाला पाहायला मिळाला. या स्पर्धेत अजेय राहून भारतीय संघाने जेतेपदाची ट्रॉफी उंचावली. कुठल्या एका खेळाडूमुळे नव्हे, तर सर्व खेळाडूंनी मिळून भारताला विजय मिळवून दिला. भारतीय खेळाडूंचं कौतुक होत असताना, आर अश्विनने या स्पर्धेतील ११ खेळाडूंचा संघ निवडला आहे. या संघात त्याने केवळ ४ भारतीय खेळाडूंना स्थान दिलं आहे.

आर अश्विनने आयसीसी चॅम्पियन्स ट्रॉफीत दमदार कामगिरी करणाऱ्या ११ खेळाडूंचा संघ निवडला आहे. या संघाची निवड केल्यानंतर सर्वांनाच आश्चर्याचा धक्का बसला आहे. कारण त्याने मोहम्मद शमी आणि रोहित शर्माला स्थान दिलेलं नाही. तर केवळ ४ भारतीय खेळाडूंना आपल्या प्लेइंग ११ मध्ये स्थान दिलं आहे. रोहित, शमीसह त्याने हार्दिक पंड्या, केएल राहुल आणि अक्षर पटेलसारख्या खेळाडूंनाही या प्लेइंग ११ मध्ये स्थान दिलेलं नाही.

या फलंदाजांना दिलं स्थान

आर अश्विनने सलामीवीर फलंदाज म्हणून न्यूझीलंडचा युवा फलंदाज रचिन रविंद्र आणि इंग्लंडच्या बेन डकेटला स्थान दिलं आहे. रचिन रविंद्रची या स्पर्धेतील सर्वश्रेष्ठ खेळाडू म्हणून निवड करण्यात आली आहे. तर डकटनेही धावांचा पाऊस पाडला. त्यानंतर तिसऱ्या क्रमांकावर खेळण्यासाठी विराट कोहलीची निवड करण्यात आली आहे. तर चौथ्या क्रमांकावर श्रेयस अय्यरची निवड केली आहे.

या गोलंदाजांना दिलं स्थान

अश्विनने आपल्या प्लेइंग ११ मध्ये गोलंदाज म्हणून भारताच्या वरुण चक्रवर्ती आणि कुलदीप यादवची निवड केली आहे. अफगाणिस्तानचा अष्टपैलू खेळाडू अजमतुल्लाह उमरजई, न्यूझीलंडच्या मायकल ब्रेसवे, ऑस्ट्रेलियाच्या जोश इंग्लिस आणि दक्षिण आफ्रिकेच्या डेव्हिड मिलरची निवड केली आहे.

या स्पर्धेत भारतीय फिरकी गोलंदाजांचा दबदबा पाहायला मिळाला. वरुण चक्रवर्ती आणि कुलदीप यादवने मिळून फलंदाजांचा चांगलाच समाचार घेतला. यासह वेगवान गोलंदाज म्हणून एकमेव गोलंदाज मॅट हेनरीची निवड केली आहे. हेनरीने या स्पर्धेत गोलंदाजी करताना ४ सामन्यांमध्ये १० गडी बाद केले होते.