पाकिस्तान क्रिकेट बोर्ड म्हणजेच पीसीबीने दक्षिण आफ्रिकन खेळाडू कॉर्बिन बॉशवर आयपीएलमध्ये सहभागी झाल्याने एका वर्षाची बंदी घातली आहे. कॉर्बिन बॉश हा आयपीएल २०२५ मध्ये मुंबई इंडियन्सच्या ताफ्यात सामील झाला आहे. मुंबईच्या संघातील लिजाद विलियम्स हा दक्षिण आफ्रिकन खेळाडू दुखापतग्रस्त झाल्याने त्याच्या जागी कॉर्बिन बॉशला मुंबईकडून संधी देण्यात आली.

कॉर्बिन बॉशने जानेवारी २०२५ मध्ये पाकिस्तान सुपर लीगच्या पेशावर जाल्मी फ्रेंचायझीकडून खेळण्यास होकार दिला होता. पण त्याने पीएसएलऐवजी आयपीएलमध्ये सहभागी होणे निवडले. त्यानंतर कराराचे उल्लंघन केल्याचा आरोप करत पीसीबीने कॉर्बिन बॉशला कायदेशीर नोटीस बजावली. आयपीएलमध्ये पीएसएलपेक्षा जास्त मानधन मिळत असल्याने बॉशने आयपीएलमध्ये खेळण्याचा निर्णय घेतल्याचे म्हटले जात आहे.

२२ मार्च रोजी आयपीएल २०२५ ला सुरुवात झाली. तर ११ एप्रिलपासून पीएसएल २०२५ ला सुरुवात होणार आहे. एकाच वेळी दोन्ही स्पर्धांचे आयोजन करण्यात आले आहे. दरम्यान पीसीबीने जाहीर केलेल्या पत्रकामध्ये कॉर्बिन बॉशवर एका वर्षाची बंदी घालण्यात आली असून तो पुढच्या वर्षी होणाऱ्या पाकिस्तान सुपर लीगमध्ये खेळण्यासाठी पात्र राहणार नाही असे नमूद करण्यात आले आहे.

या प्रकरणावर बॉशने प्रतिक्रिया दिली. तो म्हणाला, 'माझ्या निर्णयामुळे मी स्वत: देखील दु:खी आहे. मी पाकिस्तानच्या जनतेची, पेशावर झल्मीच्या चाहत्यांची आणि क्रिकेट प्रेमींची माफी मागतो. भविष्यात पीएसएलमध्ये परतण्याची मला आशा आहे.' पाकिस्तान क्रिकेट कंट्रोल बोर्डाने माफीनामा न स्वीकारता कॉर्बिन बॉशवर कारवाई केली आहे.