न्यूझीलंडचा अनुभवी वेगवान गोलंदाज टीम साऊदी आपल्या कसोटी कारकिर्दीतील शेवटचा सामना खेळण्यासाठी मैदानात उतरला आहे. इंग्लंडविरुद्ध सुरु असलेला तिसरा कसोटी सामना हा त्याच्या कसोटी कारकिर्दीतील शेवटचा सामना असणार आहे. दरम्यान शेवटच्या कसोटीत त्याने षटकार मारण्याच्या बाबतीत ख्रिस गेलची बरोबरी केली आहे.

आपल्या वेगवान गोलंदाजीसाठी ओळखल्या जाणाऱ्या साऊदीने यावेळी गोलंदाजीत नव्हे, तर फलंदाजीत मोठा कारनामा करुन दाखवला आहे. वेस्टइंडीजचा माजी फलंदाज ख्रिस गेल मोठे फटके मारण्यासाठी ओळखला जातो. आता साऊदीने कसोटी क्रिकेटमध्ये सर्वाधिक षटकार मारण्याच्या बाबतीत ख्रिस गेलच्या रेकॉर्डची बरोबरी केली आहे.

इंग्लंडविरुद्ध आपला शेवटचा कसोटी सामना खेळण्यासाठी मैदानात आलेल्या साऊदीने फलंदाजीत चांगलाच जोर लावला. त्याने १० चेंडूंचा सामना केला, यादरम्यान त्याने १ चौकार आणि ३ षटकारांच्या मदतीने २३ धावांची वादळी खेळी केली.

या ३ षटकारांच्या मदतीने त्याने सर्वाधिक षटकार मारणाऱ्या फलंदाजांच्या रेकॉर्डमध्ये गेलची बरोबरी केली आहे. गेलने कसोटी क्रिकेटमध्ये फलंदाजी करताना १०३ कसोटी सामन्यांमध्ये ९८ षटकार मारले होते. तर साऊदीने हा कारनामा १०७ सामन्यांमध्ये करुन दाखवला आहे.

न्यूझीलंडचा संघ आणखी एका इनिंगमध्ये फलंदाजीसाठी येणार आहे. या इनिंगमध्ये साऊदीला षटकारांचं शतक पूर्ण करण्याची संधी असणार आहे. पुढील इनिंगमध्ये २ षटकार मारताच तो षटकारांचं शतक पूर्ण करु शकतो.

कसोटी क्रिकेटमध्ये फलंदाजी करताना केवळ ३ असे फलंदाज आहेत, ज्यांना १०० षटकारांचा पल्ला गाठता आला आहे. ज्यात बेन स्टोक्स, अॅडम गिलख्रिस्ट आणि ब्रेंडन मॅक्क्यूलमसारख्या फलंदाजांचा समावेश आहे.

कसोटी क्रिकेटमध्ये फलंदाजी करताना सर्वाधिक षटकार मारणारे फलंदाज

बेन स्टोक्स- १३३

ब्रेंडन मॅक्क्यूलम- १०७

अॅडम गिलख्रिस्ट- १००

टीम साउदी- ९८

ख्रिस गेल- ९८