Rinku Singh IPL 2023: रविवारी आयपीएल स्पर्धेतील आतापर्यंतचा सर्वात चमत्कारिक सामना पार पडला. या सामन्यात गुजरात टायटन्स आणि कोलकाता नाईट रायडर्स हे दोन्ही संघ आमने सामने आले होते.

या सामान्यात कोलकाता नाईट रायडर्स संघाला अंतिम षटकात विजयासाठी २९ धावांची गरज होती. त्यावेळी रिंकू सिंहने तुफान फटकेबाजी करत सलग ५ षटकार मारले आणि कोलकाता नाईट रायडर्स संघाला विजय मिळवून दिला. आता रिंकू सिंहच्या बॅटबद्दल एक विशेष माहिती समोर आली आहे.

रिंकू सिंहने शेवटच्या षटकात ५ षटकार मारून कोलकाता नाईट रायडर्स संघाला विजय मिळवून दिला. मात्र ती बॅट रिंकू सिंहची नव्हतीच. मग ती बॅट कोणाची होती? असा प्रश्न तुम्हालाही पडला असेल. तर ही बॅट होती कोलकाता नाईट रायडर्स संघाचा कर्णधार, नितीश राणाची. स्वतः नितीश राणाने याबाबत खुलासा केला आहे.

कोलकाता नाईट रायडर्स संघाच्या अधिकृत सोशल मीडिया अकाउंटवर एक व्हिडिओ शेअर केला आहे. जो सध्या सोशल मीडियावर जोरदार व्हायरल होत आहे.

नितीश राणाला ही बॅट कोणालाच द्यायची नव्हती. मात्र कोणीतरी बॅट बाहेर आणली आणि ती बॅट घेऊन रिंकू सिंह मैदानात उतरला. हीच बॅट घेऊन नितीश राणा गेल्या ४-५ सामन्यांमध्ये फलंदाजी करण्यासाठी उतरला होता. तसेच सय्यद मुश्ताक अली स्पर्धेत देखील तो हीच बॅट घेऊन खेळण्यासाठी मैदानात उतरला होता. (Latest sports updates)

तसेच या सामन्याबद्दल बोलायचं झालं तर, गुजरात टायटन्स संघाने या सामन्यात नाणेफेक जिंकून प्रथम फलंदाजी करण्याचा निर्णय घेतला होता. प्रथम फलंदाजी करताना गुजरात टायटन्स संघाकडून विजय शंकरने २४ चेंडूंमध्ये ६३ धावांची खेळी केली.

तर साई सुदर्शनने ५३ धावा कुटल्या. या खेळीच्या जोरावर गुजरात टायटन्स संघाने २० षटक अखेर ४ गडी बाद २०४ धावा केल्या होत्या. या धावांचा पाठलाग करताना कोलकाता नाईट रायडर्स संघाकडून वेंकटेश अय्यरने सर्वाधिक ८३ धावांची खेळी केली.

तर रिंकू सिंहने शेवटी फलंदाजीला येऊन नाबाद ४८ धावांची खेळी केली आणि कोलकाता नाईट रायडर्स संघाला विजय मिळवून दिला.