भारतीय संघाने तब्बल १३ वर्षांच्या प्रतीक्षेला पूर्णविराम देत अखेर आयसीसी ट्रॉफी जिंकली आहे. यापूर्वी २०१३ मध्ये एमएस धोनीच्या नेतृत्वाखाली भारतीय संघाने चॅम्पियन्स ट्रॉफीवर नाव कोरलं होतं. त्यानंतर भारतीय संघाने आयसीसीच्या फायनलमध्ये प्रवेश तर केला, मात्र फायनल जिंकता आली नव्हती. यावेळी रोहितच्या नेतृत्वात भारतीय संघाने टी -२०वर्ल्डकपची ट्रॉफी उंचावली आहे. दरम्यान सोशल मीडियावर ॲक्टीव्ह न राहणाऱ्या एमएस धोनीने भारतीय संघाचा फोटो शेअर करत आभार मानले आहेत.

एमएस धोनी हा सोशल मीडियावर खूप कमी ॲक्टीव्ह असतो. त्याने ७ जुलै २०२३ रोजी इंस्टाग्रामवर शेवटची पोस्ट शेअर केली होती. त्यानंतर त्याने आता भारतीय संघाचा फोटो शेअर केला आहे. या फोटोच्या बॅकग्राउंडला त्याने चक दे इंडिया गाणं लावलं आहे.

भारतीय संघाला ३ वेळेस आयसीसी चॅम्पियन बनवणाऱ्या धोनीने आपल्या कॅप्शनमध्ये लिहिले की, ' भारतीय संघ वर्ल्ड चॅम्पियन! हा फायनलचा सामना पाहताना माझ्या हृदयाचे ठोके वाढले होते. दडपण असताना शांत राहून स्वतःच्या कौशल्यांवर विश्वास ठेवून भारतीय संघाने विजय खेचून आणला. याकरिता तुम्हा सर्वांचे मनापासून अभिनंदन. वर्ल्डकपची ट्रॉफी पुन्हा भारतात आणल्याबद्दल भारतीय फॅन्सच्या वतीने धन्यवाद आणि शुभेच्छा. माझ्या वाढदिवसानिमित्त अमूल्य गिफ्ट दिल्यामुळे तुम्हा सर्वांचे आभार.'

भारतीय संघाने २००७ मध्ये एमएस धोनीच्या नेतृत्वाखाली पहिल्यादांच वर्ल्डकप जिंकला होता. त्यावेळीही रोहित शर्माने महत्त्वाची भूमिका बजावली होती. आतापर्यंत जितके टी -२० वर्ल्डकप झाले आहेत. त्यामध्ये रोहित शर्माने भारतीय संघाचे प्रतिनिधित्व केलं आहे. मात्र यावेळी रोहित शर्मा कर्णधार म्हणून मैदानात उतरला आणि भारतीय संघाला टी -२० वर्ल्डकप जिंकून दिला आहे.