CSK VS KKR IPL 2025 : आयपीएल २०२५ मधील २५ वा सामना आज एमए चिदंबरम स्टेडियमवर खेळला जाणार आहे. या सामन्यात चेन्नई सुपर किंग्स आणि कोलकाता नाईट रायडर्स हे दोन संघ आमनेसामने येणार आहेत. या सामन्यापूर्वी महेंद्रसिंह धोनी आणि ड्वेन ब्राव्हो यांच्या एका व्हायरल व्हिडीओची सोशल मीडियावर प्रचंड चर्चा होत आहे.

चेन्नई सुपर किंग्सने सोशल मीडिया अकांउट्सवर सीएसके विरुद्ध केकेआर सामन्यापूर्वी एक व्हिडीओ पोस्ट केला. या व्हिडीओमध्ये ड्वेन ब्राव्हो, महेंद्रसिंह धोनी आणि रवींद्र जडेजा एकमेकांशी गप्पा मारताना दिसतात. धोनी नेट्समध्ये फलंदाजीचा सराव करताना दिसतो. तर जडेजा नेट्सच्या बाहेर असतो. अचानक त्यांना भेटायला ब्राव्हो येतो. ड्वेन ब्राव्होला पाहून महेंद्रसिंह धोनी गद्दार आला पाहा असे म्हणत टोमणा मारतो. तिघेही हसायला लागतात. ब्राव्हो पुढे जाऊन जडेजाला घट्ट मिठी मारतो. जडेजाशी बोलून हसत-हसत ब्रावो धोनीला भेटण्यासाठी नेट्स जवळ जातो. ब्रावो आणि धोनीचीही भेट होते. ते हळूच काहीतरी बोलतात आणि हसू लागतात.

ड्वेन ब्राव्हो हा कोलकाता नाईट रायडर्सचा गोलंदाजी विभागाचा मुख्य प्रशिक्षक आहे. त्याआधी म्हणजेच २०१८ ते २०२२ पर्यंत ड्वेन ब्राव्हो चेन्नई सुपर किंग्सचा महत्त्वपूर्ण सदस्य होता. त्याने सीएसकेला अनेक सामने जिंकवून दिले होते. निवृत्तीनंतर तो सध्या केकेआर संघाला गोलंदाजीचे प्रशिक्षण देत आहे. आज चेन्नई विरुद्ध केकेआर सामना असल्याने धोनीने गमतीने ब्रावोला गद्दार म्हटले आहे.

दरम्यान आजच्या सामन्यात चेन्नई सुपर किंग्सचे नेतृत्त्व महेंद्रसिंह धोनी करणार आहे. ऋतुराज गायकवाड कोपराच्या फ्रॅक्चरने दुखापतग्रस्त असल्याने आयपीएल २०२५ मधून बाहेर पडला आहे. त्याच्या जागी आयपीएलच्या उर्वरित सामन्यांमध्ये एमएस धोनीकडे चेन्नईच्या कर्णधारपदाची धुरा असणार आहे.