आंतरराष्ट्रीय क्रिकेटपासून सध्या दूर असलेल्या ईशान किशन यानं स्थानिक क्रिकेटमध्ये धुमाकूळ घातला. स्फोटक शतकी खेळीनं कमबॅक करून त्यानं बंद झालेली टीम इंडियाची दारं उघडण्याचे संकेत दिले आहेत.

मध्य प्रदेश विरूद्धच्या सामन्यात झारखंड संघाचा कर्णधार असलेल्या ईशान किशनची बॅट चांगलीच तळपली. त्यानं नैसर्गिक खेळी करत तडाखेबंद शतक ठोकलं. तो ११४ धावा करून बाद झाला. त्यानं हे शतक अवघ्या ८६ चेंडूंमध्ये पूर्ण केलं.

षटकारानं शतक पूर्ण

विशेष म्हणजे ईशान यानं हे शतक उत्तुंग षटकार ठोकून पूर्ण केलं. बऱ्याच काळानंतर झारखंडसाठी खेळणाऱ्या ईशाननं या स्फोटक खेळीतून टीम इंडियातील परतीची दारं उघडण्याचे संकेत दिले आहेत. आता तो प्रबळ दावेदार मानला जात आहे.

देशांतर्गत क्रिकेट न खेळणं अंगलट

देशांतर्गत क्रिकेटमध्ये न खेळणं ईशान किशनच्या अंगलट आलं होतं. या कारणामुळं त्याला टीम इंडियातून बाहेर पडावं लागलं होतं. याशिवाय त्याला सेंट्रल कॉन्ट्रॅक्टही गमवावा लागला होता. मात्र, यातून तो चांगलाच धडा शिकला असून, त्यानं झारखंडसाठी खेळण्याचा निर्णय घेतला आहे. दुसरीकडे टीम इंडियात कमबॅक करणं ईशानसाठी सहजसोपं नसेल. स्थानिक क्रिकेटमध्ये त्याला कामगिरीमध्ये सातत्य ठेवावं लागणार आहे.

त्यावेळी ईशाननं ऐकलं नाही!

ईशान किशन गेल्या वर्षीच्या अखेरीस टीम इंडियासोबत दक्षिण आफ्रिकेच्या दौऱ्यावर गेला होता. तो जबरदस्त फॉर्मात होता. पण तरीही त्याला प्लेइंग ११ मध्ये संधी मिळू शकली नाही. त्यावेळी त्यानं मध्यंतरीच तो क्रिकेटमधून ब्रेक घ्यायचाय असं सांगून मायदेशी परतला होता. त्यावेळी माजी प्रशिक्षक राहुल द्रविडनं त्याला रणजी ट्रॉफीमध्ये खेळण्याचा सल्ला दिला होता. पण तो स्थानिक क्रिकेटमध्ये खेळला नव्हता.

सेंट्रल कॉन्ट्रॅक्टमधूनही हटवलं

भारतात परतल्यानंतर ईशान किशन हा हार्दिक पंड्यासोबत आयपीएलच्या तयारीला लागला होता. त्यावेळी देशांतर्गत क्रिकेटमध्ये खेळण्याचा राहुल द्रविडनं दिलेला सल्ला त्यानं ऐकला नसल्याचे समोर आल्याचे वृत्त होते. त्यानंतर वाद चिघळला आणि टी २० वर्ल्डकपमध्ये टीम इंडियात त्याला स्थान दिलं नाही. तसेच सेंट्रल कॉन्ट्रॅक्टही गमवावा लागला.

ईशाननं अनेकदा आपली बाजू मांडण्याचा प्रयत्न केला. पण देशांतर्गत क्रिकेट न खेळणाऱ्यांना टीम इंडियात स्थान मिळणार नाही, अशी भूमिका त्यावेळी बीसीसीआयने घेतल्याचे सांगण्यात येत होते. आता ईशाननं बुची बाबू टूर्नामेंटमध्ये झारखंडकडून खेळण्याचा निर्णय घेतला असून, टीम इंडियातील परतीची दारं उघडल्याचं मानलं जात आहे.