IPL 2025 News : सनरायजर्स हैदराबाद आणि राजस्थान रॉयल्स यांच्यामध्ये काल आयपीएल २०२५ मधला दुसरा सामना खेळला गेला. या सामन्यामध्ये हैदराबादच्या फलंदाजांनी धावांचा डोंगर रचला. राजस्थानच्या गोलंदाजांनी त्यांनी अक्षरक्ष: पाणी पाजले. हैदराबादने दुसऱ्यांदा आयपीएलमध्ये सर्वाधिक धावसंख्या करण्याचा विक्रम रचला.

कालच्या सामन्यामध्ये प्रथम फलंदाजीसाठी मैदानात उतरलेल्या हैदराबादने २० ओव्हर्समध्ये २८६ धावा केल्या. त्यात सर्वाधिक धावा इशान किशनने १०६ केल्या. ४५ चेंडूंमध्ये त्याने शतक ठोकले. इशान किशनला अभिषेक शर्मा, ट्रेव्हिड हेड, नितीश कुमार रेड्डी, अनिकेत वर्मा यांची साथ देखील लाभली. एका वेळेला धावसंख्या ३०० पार जाणार असे म्हटले जात होते.

याच दरम्यान माजी दक्षिण अफ्रिकन वेगवान गोलंदाज डेल स्टेनने मुंबई इंडियन्सच्या चाहत्यांना धडकी भरवणारी भविष्यवाणी केली आहे. 'छोटीशी भविष्यवाणी. १७ एप्रिल रोजी आपल्याला आयपीएलमधील पहिले ३०० धावा पाहायला मिळेल. कदाचित ३०० धावा होत असताना मी प्रत्यक्ष तेथे उपस्थित असेनही', अशी एक्स पोस्ट डेल स्टेनने केली आहे.

१७ एप्रिल रोजी सनरायजर्स हैदराबाद विरुद्ध मुंबई इंडियन्स अशी लढत पाहायला मिळणार आहे. हा सामना मुंबईच्या वानखेडे स्टेडियममध्ये खेळला जाणार आहे. त्यामुळे हैदराबादचा संघ मुंबईच्या विरोधात ३०० धावा करेल असे संकेत डेल स्टेनने दिले आहेत. डेल स्टेनची ही भविष्यवाणी खरी ठरते की नाही हे आपल्याला १७ एप्रिल रोजी पाहायला मिळेल.