IPL 2025 च्या एलिमिनेटर सामन्यात मुंबई इंडियन्सने गुजरात टायटन्सचा पराभव केला. आता मुंबईचा संघ क्वालिफायर २ मध्ये पंजाब किंग्सला भिडणार आहे. मुंबई विरुद्ध पंजाब क्वालिफायर २ सामन्यामध्ये जो संघ जिंकेल, तो फायनलमध्ये जागा मिळवेल. आयपीएलची धामधुम सुरु असताना मुंबई इंडियन्सचा स्टार गोलंदाज जसप्रीत बुमराहच्या एका व्हिडीओने नेटकऱ्याचे लक्ष वेधले आहे.

व्हायरल व्हिडीओमध्ये जसप्रीत बुमराहने मुंबईचा संघ अहमदाबादमध्ये फायनल खेळेल असा विश्वास व्यक्त केला आहे. 'मुंबईच्या संघाला अहमदाबादला (फायनल खेळण्यासाठी) घेऊन जाण्यासाठी माझे सर्वोत्तम प्रयत्न करत आहे. मी नक्की अहमदाबादला जाणार आहे', असे जसप्रीत बुमराह व्हिडीओमध्ये म्हणतो. मुंबई इंडियन्स फायनलमध्ये जाईल याची खात्री करु नका असे आश्वासन बुमराहने दिले आहे.

मुंबई इंडियन्स विरुद्ध गुजरात टायटन्स हा एलिमिनेटर सामना मुल्लानपूर येथे रंगला होता. मुंबईकडून रोहित शर्माने सर्वाधिक ८१ धावा केल्या. मुंबईने दिलेले २२९ धावांचे लक्ष्य गाठताना गुजरातने २०८ धावा केल्या. शुभमन गिल आणि कुसल मेंडिस बाद झाल्यानंतर साई सुदर्शन आणि वॉशिंग्टन सुंदर यांनी दमदार भागीदारी केली होती. जसप्रीत बुमराहने वॉशिंग्टन सुंदरला बाद करत ही भागीदारी मोडीत काढली. हा क्षण मुंबईसाठी टर्निंग पॉईंट ठरला.

कर्णधार हार्दिक पंड्याने जसप्रीत बुमराहचे कौतुक केले. जेव्हा तुम्हाला वाटेल की, सामना हातातून दूर जात आहे. तेव्हा बुमराहला गोलंदाजीला बोलवायचं, हे इतकं सोप्प आहे, असे पंड्याने म्हटले. मुंबईच्या विजयात जसप्रीत बुमराहचे योगदान मोठे असल्याचेही मुंबईच्या कर्णधाराने केले. त्याशिवाय बुमराहच्या गोलंदाजीची तुलना हार्दिकने मुंबईतील घरांच्या किंमतींशी केली.