IPL 2025 च्या पॉईंट्स टेबलमध्ये लखनऊ सुपर जायंट्स सध्या पाचव्या क्रमावर आहे. लखनऊच्या संघाने ७ पैकी ४ सामन्यांमध्ये विजय मिळवला आहे. तर ३ सामन्यांमध्ये त्यांना पराभवाचा सामोरे जावे लागले आहे. दरम्यान वेगवान गोलंदाज मयंक यादव खेळण्यासाठी फिट झाल्याने लखनऊच्या संघाला मोठा दिलासा मिळाला आहे.

लखनऊ सुपर जायंट्सच्या सोशल मीडिया अकाउंटवर एक व्हिडीओ पोस्ट करण्यात आला. या व्हिडीओच्या माध्यमातून मयंक यादव आयपीएलमध्ये खेळण्यासाठी परतला असल्याची घोषणा करण्यात आली आहे. मयंक यादव पाठीच्या दुखण्यामुळे आयपीएलमधून बाहेर पडला होता. सीझनच्या सुरुवातीला तो परतण्याची शक्यता वर्तवण्यात आली होती. पण पायाच्या बोटाला दुखापत झाल्याने मयंक यादवचा कमबॅक लांबणीवर पडला. पण आता पूर्णपणे फीट झाल्यानंतर मयंक यादव मैदानावर कमबॅक करण्यास तयार आहे.

मयंक यादवने आक्रमक गोलंदाजी करत आयपीएल २०२४ मध्ये धुमाकूळ घातला होता. त्याने सातत्याने १५० किमी/ताशी पेक्षा जास्त वेगाने गोलंदाजी केली होती. मागच्या सीझनमध्ये तो लखनऊसाठी फक्त ४ सामने खेळला होता. मेगा लिलावापूर्वी लखनऊ सुपर जायंट्सच्या ५ राखीव खेळाडूंमध्ये त्याचा समावेश होता.

लखनऊ सुपर जायंट्सचे मुख्य प्रशिक्षक जस्टिन लँगर यांनी मयंक यादवच्या प्रकृतीत सुधारणा झाल्याचे म्हटले होते. मयंक सध्या फिट आहे. तो मैदानात खेळण्याच्या तयारीत आहे. काल मी एनसीएमध्ये गोलंदाजी करतानाचा त्याचा व्हिडीओ पाहिला होता. मयंक यादव ९० ते ९५ टक्के वेगाने गोलंदाजी करत आहे. दरम्यान लखनऊचा संघ पुढील सामना १९ एप्रिल रोजी राजस्थान रॉयल्सविरुद्ध खेळणार आहे. या सामन्यात मयंकचा समावेश केला जाईल अशी शक्यता वर्तवली जात आहे.